Minista blong Climate Change, Hon. Ralph Regenvanu hemi remindem Palamen haos long rekwes blong komuniti long New Caledonia blong oli save vot long wiken blong Referendum wik.
Minista risponsibol blong Referendum, Hon. Johnny Koanapo hemi talem se bae oli saenem Oda blong Referendum blong bildim ol niu polling stesen long ol area wetem pua akses.
Minista blong Intenol Afeas, Hon. Johnny Koanapo hemi konfem se long wik ia oli rekodem wan amaon blong 13, 336 Nasonal ID kads we oli printem, folem wok blong ol ofisa long ol provins.
Minista hemi presentem ripot blong ol ID kads folem konsen blong Member blong Port Vila konstituensi, Hon. Ulrich Sumptoh we hemi resem long fes Odineri Sesen long Palamen tudei.
Hon. Sumptoh hemi askem hao nao bambae Gavman hemi sapotem situasen blong ol pipol we oli nogat ID kat.
“Plante long ol citizen blong yumi oli nogat nasonal ID kad, amendment blong Constitution hemi nidim voes blong evriwan,” Hon. Sumptoh hemi talem.
“Ino hemia nomo we nogat nasonal ID kad be fulap kad oli nid blong aktivatem.”
Minista Koanapo hemi rispon mo talem se long Malampa oli reprintem 1,990 ID kad, long Penama i kat ova 3,845, Torba i kat 1,753 mo Tafea ova 2,968.
Hemi talem se ol Ofisa oli ko aot long ol area council blong oli finemaot olgeta gaps long namba blong ol ID kad long evri provins long Vanuatu.
“Hemi wan problem blong ol Eleksen long past, but this Referendum, as long as yu kat ID kad, it doesn’t need you to validate with Elektrol roll, hemia nao hemi Amendment we yumi karem kam insaed.”
Deputi Praem Minista mo semtaem Minista blong Foren Affeas hemi konfiden se bae majority long ol pipol bae oli vot YES blong sapotem Referendum nekis manis.
