Raet to Infomesen (RTI) Act hemi stap blong mekem sua se yumi no spreadem ol kiaman infomesen long pablik.
VBTC Insaed long Nius prokram long Mandei wetem RTI Unit Maneja, Harold Obed hemi tokbaot hao wan man hemi save skelem infomesen sapos hemi tru o ino tru, mo blong save wanem nao hemi misinfomesen mo disinfomesen.
“Infomesen hemi kam long form blong data, ol raw material, oli putum kam tugeta i kam osem infomesen, taem yumi ridim, yumi andastandem wan samting,” Mr Obed hemi talem.
Hemi talem moa se Misinfomesen mo Disinfomesen yumi usum long benefit o long interes blong yumi be no blong general interest blong ol narafala man.
“Misinfomesen hemi minim wan infomesen we i kamaot afta hemi ino intentional, yu storian long wan samting be yu tu no save se hemi wan kiaman be yu storian long hem bakegen, that’s Misinfomesen.
“Be yu nosave se hemi wan kiaman stori, ino tru.
“Disinfomesen hemi diferen bakegen, hem tu hemi kiaman be hemi intentionally, yu minim blong kiaman long benefit blong yu.
“Yu really minim blong yu kiaman, yu talem wan samting we yu tinkse bae convincem wan man ia blong hemi mekem wan samting.”
Mr Obed hemi talem se Right to Infomesen Law ia hemi wan rekwes blong olgeta NGOs we oli pusum Kavman blong mekem kam wan law blong helpem ol pipol.
“Hemi blong mekem se yumi no spreadem ol kiaman infomesen.”
Hemi explenem se Law ia hemi gud from hemi mekem olgeta Kavman agensi oli proactive blong pablishim aot ol infomesen long saed blong wok blo olgeta blong evriman i save.
“Taem yu rekwes wan samting anda long Right to Information Act, yu CC long email blong mifala rti@vanuatu.gov.vu , taem yu CC long hemia mifala kat copy blong wanem yu stap askem.
“Taem yu askem hemi kam olsem wan obligation blong institution o agency blong askem infomesen anda long ACT.”
Hemi talem se olgeta long aelan we nogat netwok akses bae oli save askem moa infomesen long ol Area administrator, blong oli lidim olgeta kasem RTI website mo fulumap olgeta forms blong rekwes eni infomesen oli wantem save.
Wetem 13 dei nomo i stap kasem Nasonal Referendum long Mei 29th, Mr Obed hemi apil tu ko long ol Sosel media grup blong lukaotem ol facts mo putum aot long pablik blong save.
“Wok blong yumi long media hemi stret yanao, yumi lukoatem facts behind long hem.
“Bambae ol pipol aotside oli trastem moa long wanem yumi insaed long Media, Mainstream media, yumi publishem mo yumi broadcastem, bitim wanem we stap long sosel media, from taem yumi mekem bae oli save se hemia hemia tru yanao, it’s all facts.”
Hemi talem tu se olgeta awenes blong Referendum ia hemi no olsem awenes be hemi olsem wan kampen.
“Hemi olsem wan kampen, ino awenes, awenes hemi team u traem storian long tugeta saed blong ol man oli understandem.
“Hemi mo olsem wan kampen, yu ko blong traem winim man blong sapotem yes, yu ko blong winim man we bae sapotem NO.”
Raet to Infomesen Unit hemi stap anda long Praem Minista Ofis mo hemi kivim efek long paragraph 1 (5) (G) blong Constitution long stamba raet mo fridom blong wan man o woman blong kat fridom blong talem tingting blong hem.
