Vanuatu hemi winim bak rank blong hem olsem namba 1 long Happy Planet Index (HPI) raon long wol long yia ia 2024 afta 18 yia we pas.
Minista blong Tred, Hon. Bob Loughman hemi givim announcement ia taem hemi ofisali lonsem ‘Happy Long Life’ exhibition long Vanuatu Kaltural Senta las wik.
Happy Planet Index hemi wan tul blong jusum sustainabiliti blong development long wol mo hemi hapen evri 3-4 yia stat long 2006 we Vanuatu hemi bin namba 1 long wol.
Hon. Bob Loughman hemi talem se Vanuatu hemi wan efficient kauntri long wol blong deliverem sustainable wellbeing blong ol pipol.
Hemi askem sapos ol nara Pasifik kauntri oli save engage long semak rod blong lukluk long Human Development Index (HDI) olsem wan gudfala tool blong soem process long hao wan ekonomi hemi gro.
“Mi tinkse hemi consistent blong deliverem Happy Long Life long ol pipol we oli no spolem enviroment,” hemi talem.
“Naoia we yumi topem ranking long olgeta kauntri long wol long HPI mo yumi once again, kam most efficient kauntri long wol long saed blong sustainable wellbeing.
“Eye blong wol i stap long yumi bakegen tedei, mo olgeta eye ia i traem blong lukluk long wanem nao Vanuatu i kat we ol nara kauntri oli nogat.
“Responsibiliti i kam long yumi wan wan, yumi kam tugeta tudei blong selebratem gudfala enviroment blong yumi we yumi maintainem ova long thousand yia we i pas.
“Yumi soem long wol olegta samting we i mekem yumi different long olgeta rich kauntri long West.”
Long behaf blong Minista blong Faenans, Minista blong Helt Hon. John Still Tari hemi explenem se olgeta long United Nations nao oli pablisim Human Development Index folem trifala stamba indicator blong Helt, Edukesen mo Income.
“Yumi save lukim hao yumi perfom long index mo hao nao posisen o mak blong yumi i jenis taem oli pablisim index evri taem, blong wan kauntri i stap long wan index olsem, hemi mas kat data we hemi available.
“Happy Planet Index hemi independent long mane mo hemi skelem olgeta kauntri long ability blong olgeta blong transfomem olgeta natural risos blong olgeta i kam wellbeing blong ol pipol.”
Minista Tari hemi tokbaot se HPI hemi rankem olgeta kauntri long abiliti blong olgeta blong provaedem hapi mo longfala laef long olgeta pipol long wan fasin we i no distroem enviroment.
Hemi explenem se ‘Happy Long Life” exhibition long Vanuatu Kaltural Senta hemi soem long wol mo blong remindem ol pipol long Vanuatu long olgeta samting we yumi kat we i mekem se yumi stap long #1 long wol long HPI.
HPI hemi lukluk long:
- Laef expectensi – we hemi stamba indiketa blong Helt. Development blong wan kauntri i no sud daonem helt blong populesen.
- Experience blong wellbeing – we hemi stamba indiketa blong happiness. Development blong wan kauntri i no sud daonem happiness blong populesen.
- Consumption – we hemi stamba indiketa blong kwaliti blong natural enviroment. Development blong wan kauntri i no sud spolem natural enviroment we populesen i dipen long hem blong lidim longfala mo hapi laef.
Yumi save lukim Vanuatu long HPI bakegen tru long had wok blong olgeta long Vanuatu Bureau of Statistics long Melanesian Wellbeing Indiketa projek.
Vanuatu hemi hem wan nomo aot long evri Pasifik aelan kauntri we i joenem HPI from ol nara kauntri oli no kolektem data long ol wellbeing blong ol pipol.
