Suango Skul long Mele bae i open bakaken long namba 10 February 2025, afta we ol damej blong earthquake i mekem skul i delay blong wan wik.

Akting Prinsipol blong skul, Madame Maina Taravaki, i talem se plante bilding i kasem crack mo i gat problem blong wota afta long earthquake. “Suango Skul i stap long wan ples we oli kolem disasta zone mo earthquake ya i mekem ol problem blong mifala i moa bigwan,” hem i talem.

Blong mekem sua se ol pikinini oli no stop long skul, Ministry blong Education mo UNICEF i givhan wetem ol tent blong temporeri classroom. Mifala i stap wet yet long niufala wota tank from ol wota tank blong skul i bin brok long taem blong earthquake.

Kavman i talem blong bildim niufala skul, be fes step nao hemi blong faenem wan gudfala ples blong relocatem skul i go. Mele Komuniti mo ol Jif oli stap wok tugeta blong faenem ples ya.

“Mifala i glad tumas long help blong Ministri blong Edukesen, be yumi mas wok tugeta blong faenem wan sef mo permanent solusen,” Taravaki i talem.

Bae i gat moa apdeit taem plan blong relocation i gohed.