Vanuatu hemi gat wan helti solwota we i sapotem ol koral rif, wan stadi i faenem.
Survei stadi blong okanaesen Blue Prosperity, hemi stat long namba 1 kasem 21 Septemba long yia ia, mo hemi wan long ol bigfala survei o stadi long ol koral ref long Vanuatu.
Hemi stil tekem taem blong kat wan gud klia mo faenol risol blong stadi; be ol fes lukluk long stadi risol ia hemi sowem se Vanuatu hemi kat wan klin, sef mo helti solwota mo koral rif.
Ministri blong Foren mo Oceans Afea mo Blue Prosperity hemi kam blong putum aot ol risol blong stadi long wik ia.
Stadi i kaveremap six provins long kantri mo hemi lukluk moa long helt blong ol koral rif, ol difren kaen fis, mo ol nara difren type blong ol animol we oli laef long sowota.
Sam long ol risol we ol scientists oli faenaot, hemi Vanuatu i kat fulap difren kaen koral rif, fulap laef mo animol oli liv long solwota mo fulap difren kaen fis we oli no save faenem raon long wol.
Risol hemi sowem se i kat plante koral rif we hemi brokbrok long taem blong ol natoral disasta, olsem wan tropikal cyclone mo taem we solwota i hot o warm tumas; be stil i kat laef mo hemi save grow I kam antap hariap long ol difren weta kondisen raon long kantri.
Blue Prosperity Vanuatu program hemi wan 5-yia patnasip we Vanuatu kavman i kat wetem Waitt Institute tru long wan Memorandum of Understanding saening long manis Februari long yia ia.
Agrimen ia hemi kam tru long Nasenol Oceans Polisi plan blong kavman.
Program ia ba hemi sapotem bigwan Nasenol Ocean Polisi, 100% sastenebol ocean manejmen, mo ful proteksen blong 30% blong laef long solwota.
Ol informesen o data long stadi ia, bai hemi sapotem bigwan ol infomesen we kavman mo ol komuniti oli stap usem blong save impruvum mo putu tugeta save blong ol pupu, hao blong protectem, mo usem ol save ia blong manajem ol koral rif raon long kantri.
