Ifira Black Bird FC i stil putum nem blong hem long Port Vila Futbol Asosiesen PVFA se emi still nabawan klap long lik ia.
Hemia afta we i aotem Foma PVFA jampion Klab Galaxy FC long Grand Finals blong ABM kap 2024 long 3-1.
Galaxy FC nao emi faenem net feswan tru long midfiel straeka blong hem Joe long fes haf mo bifo fes haf i vinis Samuel Kalorus i faenem net blong Galaxy FC long wan naes fri kik blong Godin Tenene mo sendem tufala Klab iko long haf taem long 1-1.
Long seken haf wetem mo presa weh Ifira Black Bird FC i putum i lukim wan on gol we Galaxy FC emi putum taem Kerri Iamak i jipim bol ia mo difenda blong Galaxy FC i putum bol ia long net blong hem.
Taem ol fans oli stap expektem se sko ia bae i stap kasem mats i vinis be i lukim koj blong Ifira Jean Robert Yalu i putum wan moa plas long kem ia taem emi putum in tufala risev pleia blong hem Kano Tawia mo John Tas.
Mo tufala nao i adem wan moa poin mo sendem Ifira Black Bird FC i kam jampion blong ABM Kap 2024.
Grand Finals mats ia ova long taosens futbol sapota I bin atendem long Port Vila Stadium.
Long smol finals Mauriki FC nao emi kam aot wina taem i aotem Erakor Golden Star FC long penalti sut aot long 4-2 afta long 2-2 long ful 90 minit.
Mo long narafala nius Vadafone premia lik 2023-2024 bae i kikof long wik ia afta long ABM gran faenal lo wiken.
Fes matj bae i stat long tosdei 21 March, hemia long wik ia.
