Inflation hemi wan bigfala jalenj long Vanuatu Kavmen blong hemi wok had blong save faenem sam solusen blong redusem praes blong ol samting long kauntri.

Hae percentage blong inflation long kauntri hemi 14% mo hemi mekem histori long Vanuatu mo pipol oli stap fesem impak blong hem long laef blong olgeta.

Minista blong Faenans, John Salong hemi talem se long yia ia bae Vanuatu hemi go het blong luk inflation folem ol war we stap happen  long ol bigfala kauntri.

Folem ekonomik growth blong kauntri las yia, pipol bae oli stil lukim price blong ol samting lo stoa hemi go antap from hae percentage blong inflation we i stap.

Minista Salong hemi komen long inflation folem presentation blong  long palemen tedei, we hemi talem se bae kauntri hemi kontinu blong facem ol impack blong inflation long yia ia.

“Though basic ekonomik blong region hemi stap long positif pat bae region hemi kontinu blong fesem ol impak blong inflation, impak blong ol war mo geopolitikol tensions we i stap hapen long fulap region long wol,” Mr Salong hemi talem.

Lida blong Opposition, Ishmael Kalsakau hemi questionem muv blong Reserve Bank folem ol saen blong inflation we kauntri hemi stap luk long ol pas yia finis i kam.

“Yumi sapraes tumas we inflation iko antap bigwan olsem ia, nokat wan explenesen long Palamen mo long pablik blong save why nao Reserve Bank ino muv kwik taem we oli luk save finis sam long ol saen blong inflation istap kam antap,” Mr Kalsakau hemi talem.

“Bigfala rod blong kontrolem inflation hemi wna manded blong patna blong Kavman we hemi Reserve Bank.”

Mr Kalsakau hemi talem se inflation hemi stap ko antap evri kwota mo i lukim olgeta impak we praes hemi stap ko antap, mo hemi stap minim seh laef bae hemi kam moa sas long Vanuatu.