Wok blong pikimap toti long Port Vila minisipol eria i kam wan mata ova long festiv sisen blong las yia.

Hemi fes wik blong 2024 mo yumi lukim selebresen blong krismas mo niu yia i kam wetem wan hae namba blong toti long plante eria raon long Port Vila.

Situasen ia i mekem pipol i resem konsen ko long otoriti we risponsibol from longfala taem we i tekem blong pikimap toti mo oli no stap follem stret taem blong hem.

Wan lokol long Freswota eria, Patis Johnson i talem se ol plastik toti long eria ia i stap ova long festiv sisen finis kasem naoia.

“Mifala i krismas wetem ol yelo plastik ia finis ia,” hemi talem

“Be mifala no laekem from taem mifala klinim eria blo mifala i klin be yelo plastic ya i stil stap.”

Wan moa lokol long Freswota, Naomie Tovovur i talem se problem blong yelo plastik ia i kam olsem wan mata we i kostem olgeta tu.

“Mi ting se mifala pem plastik tu taem-tri taem be ol toti oli silip yet i stap.

“Ale ol dok i terem olgeta, ol daepa i silip olbaot, ol tin i silip olbaot i mekem tumas toti from oli no kam pikimap kwik.”

Hemi talem se ol toti oli smel mo team yu wokbaot yu luk blu flae i fulap long rod.

From nomo se hemi taem blong ples i stap hot mo bae mekem ol rapis smel blong toti hemi kam wan problem long ol pablik ples.

Sam mama we i salem kuk kakai long maket oli resem konsen folem sefti blong kakai mo ol kastoma blong olgeta.

Wes Manejmen blong Port Vila Minisipol Kaunsel we i lukluk long mata ya, i talem se i bin gat sam mekanik problem wetem ol trak we oli risponsibol long ol toti ya.

“Taem we trak emi no ron blo wan o moa dei, hemi sta createm wan back-lock (slowem wok) blo ol collection (pikimap) blo toti,” hemi talem.

“Then hemia nao i risal long ol toti i stap longtaem and then i smel long ol yad raon lo yumi lo Port Vila.”

Hemi talem se manejmen bae i mek sua blong pikimap mo kliarem ol toti long wik ya.

Mr. Andrew i gohed blong talem se evri yia populesen long Port Vila i go antap mo i mekem se namba blong toti tu i folem.

Hemi tok moa se hemia i wan jalenj long manejmen taem i kam long evri festiv sisen we hemi long krismas mo niu yia.

Wetem evri 5 wod long Port Vila taon, bae i kat wan nomo we i mas lukim isiu blong toti taem i gat problem wetem pikimap toti blong olgeta.

Plante long pablik i pointem mo askem otoriti blong mas tingting strong long mata ia taem i kam long festif sisen o long taem blong lafet.