Trifala liquidators blong Ernst and Young blong Australia we ol shareholders oli appointem olgeta olsem ol voluntary Liquidators blong Air Vanuatu, oli takeova finis long bisnis long Nasonal Airline long yestete 9 May, 2024.

Ol liquidator ia, Morgan Kelly, Justine Walsh, mo Andrew Handson oli kasem kaontri yestedei tru long wan private jet afta weh evri flight blong Air Vanuatu oli kansel.

Tedei Gavman hemi ofiseli anaonsem engagement blong Ernts and Young.

Minista blong Faenans, John Salong hemi tekem responsibili olsem person we bae hemi link bitwin Ernts and Young wetem Gavman.

Gavman i talem se global jalens blong aviation industry i bin afektem tu Air Vanuatu includim situation blong Covid-19.

Statement we Gavman hemi sendem aot tedei ino talem eni samting abaot politikol interference or pua manegmen, olsem weh fulap man oli stap talem espesiali tru long sosol media. 

Mr. Salong i se situation blong Air Vanuatu hemi bin resalt blong longtaem events.

“Yumi save situation blong Air Vanuatu wetem ol books blong hem, olgeta complaints mo yumi no mas fogetem se wetem Covid-19, whole Airline Indastri long wol i affected,” Hon. Salong I talem.

Hemi se afta long olgeta isiu ia, Shareholder oli finali meet mo desaed se Airline hemi nidim sam specialist people blong solvem ol problem blong hem.

“Then long namba 2 May, olgeta Shareholder, wetem Praem Minista we hemi gat 97% share hemi desaed blong hirem the best organization we hemi specialist long Airline Indastri we hemi save olsem wanem blong dil wetem ol isiu we ol Airline raon long wol I fesem. Ernst and Young nao hemi company ia.”

Hemi se fes wok weh oli mekem hemi blong kontaktem safety mo mentenenj jeks bifo Air Vanuatu hemi save risumum ol nomol operasens blong hem.

“Fes something hemi blong mekem sure se ol employee oli kam long wok mo providem normal service blong olgeta.

“Then narawan hemi blong mekem suo se eni aircraft we hemi iusim name ia Air Vanuatu hemi sef blong hemi fly.”

Nomata weh fulap pasenga oli stranded naoia i stap long ol Airports long Australia, New Zealand mo ol narafala lokol mo regional destinations, ol liquidators oli plan blong resume ol flights bakegen taem bae i posibol.

Oli seh bae oli infomem ol pasenja weh oli affected mo rebookum ol flights taem operatsens hemi stat bakegen.

“Gavman hemi wantem lukim se olgeta stranded passenger ia oli kasem destinations blong olgeta. And bae olgeta Administrator ia hemi wok long next phase blong arangemen ol flaet blong olgeta.

“And sapos hemia ino posibol bae Gavman hemi step in mo iusim diplomatic connection blong hem blong mekem suo se hemi tekem bak ol sitisen blong hem.”

Gavman i stap apeal i go long ol citizens blong Vanuatu mo jenerol publik blong stap kwaet mo antasanem disisen blong Gavman from Gavman i nomo save putum pablik funds insaed long wan insolvent kampani.

Long record, Gavman hemi guarantee olgeta loan we Air Vanuatu hemi mekem long ol institution long kauntri.

“Olgeta Loan blong VNPF mo BRED BANK, Gavman hemi guarantee long hem, therefore bae Gavman hemi gat obligation blong mekem suo se oli repaid.”

Olsem wan long ol mein industri weh i afekted blong isus ia, Vanuatu Hotels and Resorts Association (VHRA) hem i kamaot blong resem konsen blong hem from isu blong Air Vanuatu hem spolem bigwan reputation blong Vanuatu long ol ovasi tourism markets.

VHRA i talem seh livelihood blong thousands bong ol Ni-Vanuatu weh oli wok long ol hotels mo resorts i stap long bigfala risk naoia.

Vanuatu Hotels and Resorts Association i stap kol i go long Gavman blong tekem aksen kwit taem blong ol seves blong Air Vanuatu i mas continue kwik taem blong save recoverem back reputesen blong Vanuatu.

Mo wetem engagement blong Ernts and Young, hemi save givim confident long Praevet Sekta.

“Sam memba blong Praevet Sekta i congratulate mi from wanem i stap happen mo oli se hemi wan gudfala rod blong helpem Air Vanuatu.

“Praevet sekta i fully sapotem wanem Gavman i stap mekem naoia.”

Crisis blong Air Vanuatu hemi luk olsem i gat solution blong hem long Horizon naoia mo Gavman hemi determine blong faenem wan lasting solution blong ol isiu weh i stap spolem reputesen mo konektiviti blong Kaontri.