Long wan bigfala muv blong mekem tingting blong ol investa i kam strong moa, Gavman blong Vanuatu i apruvum wan niufala polisi we i mekem maksimam yia blong ol land lis i go antap aot long 75 yia i go kasem 99 yia.
Minista blong Lands mo Natural Resos, Hon. Rick Tchemako Mahe I talem long VBTC News se Polisi ya i blong givim moa confidens long ol investa, speseli long ol bigfala projek mo divelopmen olsem ol Hotel mo Resort.
Long bifo, ol land lis long Vanuatu oli stap long 75 yia mo naoia plante long ol Lis istap long nomo long 20 – 40 yia.
“Be gavman i luksave se i nid blong leftenem term ya blong pulum moa bigfala investmen mo blong mekem se wan investor hemi confident se isave gat return long investment blong hem,” Hon Mahe I talem.
Wetem wan 99 yia lis, Vanuatu save kam kam wan ples we olgeta bigfala project I kirap long jem.
Policy ia hemi kam inlaen we Mini Township projek we gavman hemi wantem setemap long olgeta aelan olsem Santo mo Efate.
“Olsem Minista blong Lands mi talem bigfala tankiu long Gavman blong tedei wetem ol MP we I sapotem tingting ia. From long end blong dei bae hemi givim confidens long wan investor we bae hemi kam blong helpem kauntri I develop mo hemi givim wok long manples mo hemi,” Hon. Mahe I talem.
Polisi pepa ia wetem proposal blong Amendment blong Land Lease Act bae hemi go befo long palemen long yia ia.
