Bigfala pati blong kauntri mo oldest sins long independens, Vanua’aku Pati talem se forgiveness nao hemi save help blong solvem politikol instabiliti long kauntri.

Mbe pati hemi save considarem sapot blong hem long wan Motion blong ino gat Trast long Praem Minista nomo sapos hemi feel olsem bae i last.

Presiden blong VP, Bob Loughman i talem toktok ia taem hemi anaonsem se pati istap tekem step finis blong mekem sam reconciliation wetem ol politikol pati.

Hemi se wan reconciliation we ibin hapen between VP mo National Unaeted Pati, hemi blong mekem se ino gat tumas raorao mo harem nogud among long ol politikol lida.

Hon Loughman i talem se olsem oldest politikol pati, VP hemi wantem tekem lid ia.

“Vanua’aku Pati hemi bilif se yumi olsem ol Man Vanuatu, i save lidim kauntri ia. aot long politikol instabiliti blong yumi dei,” Hon Loughman i talem.

“Blong tekem desisen ia bae yumi putum aside pesenol diferenses blong yumi as an individual mo olso olsem wan politikol grouping.

“Yumi putum asaed ol pesenol diferenses ia mo yumi luk fowod long nasenol interest long kauntri blong yumi.”

Presiden blong pati, Hon Loughman i talem se wan samting we VP hemi inisietem long 2019 hemi Politikol Integriti Bill.

Bill ia Palemen ino tokabaot yet.

Mbe Secretari Jenerol blong pati, Hon. Johnny Koanapo Raso ise VP bae hemi sapotem Politikol Intergriti Bill taem iko befo long Palemen.

Hemi se pepes blong Bill ia hemi blong igat politikol stabiliti.

Mbe hemi se ova long ol yia we i pas, Bill ia oli bin stap jensem smolsmol from sam politikol interest blong sam pati.

“Igat alot of things we hemi bin mentioned insaed long Bill ia and mi bilif se current draft we istap befo long palemen hemi bin watered down because of diferen interest,” Hon. Koanapo i talem.

“Yumi mas wotarem daon bill ia blong fitim interest blong ova 21 politikol pati we oli stap tedei plus movemen we yumi gat. So taem yu traem naviget wetem Bill ia everi politikol pati oli wantem interest blong olgeta ikam insaed.”

Motion blong i nogat Tras

Vanua’aku Pati i talem se bae hemi mas considerem everi taem wan Motion blong nogat tras blong mekem suo hemi wan samting we bae i las.

Hon Loughman i talem se “Babae hemi depen long weta o not bae arenjmen olsem isave las. Bae isave las olsem ol big gruping bae pati hemi considarem”.

“And yumi bilif se Intergriti Bill we yumi wantem introducim bae i helpem yumi blong future. Sapos yumi everi politikol lida yumi agree se hemia nao hemi wei fowod, yumi everiwan yumi sapotem Bill ia long palemen,” hemi talem.

Praem Minista Charlot Salwai

Hed blong Gavman, Praem Minista Chalot Salwai Tabimasmas i talem se hemi welkamem desisen blong Vanuaaku Pati blong faenem solusen blong Politikol Stabiliti.

“Hemi wan kol we mi bin mekem finis blong olgeta Politikol Pati ikam tugeta blong faenem solusen. Mi glad we Vanua’aku Pati hemi tekem step ia blong sapotem Bill from hem nao hemi statem wokbaot ia,” Hon Salwai i talem.