Vanuatu Tija Union (VTU) wetem bos blong olgeta tija, Tijing Sevis Komisen (TSC), i stap faet ova long wan bigfala straek we istap gohed.
TSC i talem se straek ia i no folem loa, be VTU i talem se TSC i stap traem blong mekem ol memba blong hem I fraet.
Straek ia, we i mekem plante skul long kantri i no stap folem program blong skul, VTU i statem from ol samting olsem outstanding allowance, housing mo ol nara finansol entaetolmen we ibin stap longtaem finis.
Be naoia, kwestin blong loa i stap kam antap long straek ia. Ofis blong Loa blong Gavman i talem, State Loa Ofis I bin infomem Komisina blong Leba se strekae ia i no folem loa, from VTU i no bin givim notis blong 30 dei bifo oli statem.
Anda long Trade Dispute Act section 33A (cap 162) hemi givim toktok long saed blong straek mo ol nara Indastrol Aksen.
Advaes ise Action we istap naoia ino gat Notis blong hem.
VTU hemi relae long wan clause insaed long “Undertaking Agreement” blong recall Straek Aksen ia we hemi stat long Sarere namba 10 Okis.
TSC oli wari tumas long straek ia, mo talem se i no folem loa mo tu i stap spolem edukesen blong ol pikinini.
Secretariate blong TSC, i bin askem VTU blong stopem straek mo talem long Provinsol Edukesen Ofisa blong tekem nem blong olgeta Tija we ino wantem ko bak long ol klas.
Be long narasaed, VTU i stanap strong mo i stap tokbaot se TSC i stap yusum ol fasin blong mekem ol tija oli fraet.
Unian i talem se bambae oli gohed long straek kasem taem we olgeta setelem kleim.
Ol dispiut ia i mekem plante parent, ol pikinini, mo pablik i stap i stap askem blong olgeta i faenem wan rod blong stretem kwiktaem.
Taem ol toktok ia i gohed, ol man i stap wet blong luk wanem bambae i kam next long VTU mo TSC, mo wanem bambae i save hapen long edukasen blong ol pikinini blong Vanuatu.
