Vanuatu Rural Development Bank i givim aot 600 niu loan long yia ia.

Administrator blong Vanuatu Rural Development Bank, Glen Craig, i talem se ol loan ia total valiu blong hem i kasem long VT500 million.

“Mifala i kat wan gudfala tim we i stap wok hard; Mo tankiu long direksen blong kavman blong pipol i alao long moa long ova VT billion mo haf million blong ko raon long evri provins,” Mr Craig i talem.

“Mo hemia i ko long evri sekta long rural komuniti. So long tourism, agriculture, fisheries, manufacturing industry mo ol nara sekta.”

Mr Craig i talem se talem tankiu long kavman blong bank i save sapotem ol rural bisnis blong groem lokol ekomoni.

Hemi talem se oli givim sapot long micro, small mo medium enterprise we oli no save ko hed long bisnis be proses i stap blong oli mas givim bak ol mani ia.

“Ol loan we yumi stap givim aot long Yumi loan prodak, 4 percent loan interes hemia i kavman garenti so sapos wan man i no pem bak loan ia, hemi risponsibol from hemi owem mani long kavman,” Mr Craig i talem.

“Mifala i kat strong proses blong olgeta we oli aplae oli mas kat bisnis. Mo mekem sua se i kasem evri sekta from mifala i Vanuatu Rural Development Bank.”

Plante long olgeta pipol we i tekem loan oli kam long provins blong Not, be naoia i gat wan hae namba tu i kam long Tanna.

Wetem positiv rispon blong pipol bae Vanuatu hemi save luk hae namba blong bisnis i sud progres.

Kavman hemi hop blong ajivim tinktink ia tru long sapot we hemi putum i ko long bank.