Pipol bae oli expectem blong lukim evri vendors o mama lo Port Vila Maket mo Seaside Maket blong oli stat usum scale nekis yia blong salem olgeta kakae.
Fulap oli hapi long outcome blong usum scale mo oli talem se emi moa gud blong evri vendors oli usum.
Port Vila Municipaliti bae i helpm evri vendors or ol pipol we i mekem maket blong oli usum scale nekis yia blong salem ol kakai.
Hemi folem wan longfla wokbt blong olgeta wetem price monitoring weh oli traem blong finem wan wei blong save controlem ol price blong ol kakai long maket.
Port Vila Maket manager Sacha Watt emi talem se wetem high cost blong ol kakai long maket bae emi mo gud sapos evri vendors oli usum scale next yia blong kivim wan quality seves i go long ol customers blong olgeta.
“Blong konfemesen blong yufala nomo, tumoro mifala i igat olgeta olgeta blong praes monitaring blong oli kam mifala i faenolisem ol praesing we i on long 2024 iko.
“Yumi no mas rash wetem. Yumi mas skelem gud blong mekem se vendors oli gat smol selen mo kastoma hemi mas pem kakae long tebol blong hem,” Mr Watt i talem.
Silae Vanua Maket Association emi wan association we hemi lukoutm plante long ol vendors mo oli helpm olgeta blong attendem training blong save hao blong usum scale taem oli salem kakai blong olgeta.
President blong Association ia Jeannette Wallace emi talem se i kat over 300 vendors finis we oli usum scale mo oli luk se emi helpem olgeta bigwan mo oli glad long hem.
“Neks yia bae everiwan oli on long skel and hemi wan gudfala wei tu from i mekem kastom hemi gat moa prodakt blong coverem plet blong hem mo mekem se wetem 1,000 vt hemi save pem plante samting. Festaem ol vendor i mekem praes i hae tumas,” hemi talem.
Plante long ol vendors oli talem seh scale emi helpm olgeta bigwan lo saet blong shotem taem blong sale mo too winm enaf celen blong kaveremap ol expenses blong olgeta.
Oli talem se mbae hemi mo gud sapos evri wan i usum scale nekis yia.
Helena David wan vendor long Port Vila Maket, emi talem seh festaem emi harem abaot scale emi no tink2 strong long em tumas be taem emi usum emi luk i gud tumas.
“Scale emi gud from wetem process blong mi long farm kam kasem long ples ia emi gud from mi faenem aot se yes mi win from wan frut pamplemus nomo mi mekem 300 samting long wan,” Ms David i talem.
Port Vila Municipal emi stap wok tugeta wetem Silae Vanua Maket Association mo Price Monitoring blong save helpm ol vendors oli providem wan gudfla seves wetem ol quality kakai blong olgeta i ko long public mo tu make sure se vendors emi winim enaf celen long wan dei.
