Wan niu ripot we i yusum ol ansa long wan sevei we oli mekem wetem ol sisonal woka, i soem tinktink blong ol woka mo komuniti long saet blong sisonal woka skim long Australia mo New Zealand.
Ripot ia i talem se skim ia hemi kat gudfala ekonomik mo sosel benefit be sam pipol i no agri long ol faending.
World Bank mo Development Policy Centre long Australian National University i mekem wan bigfala survey long Pasifik Labour Mobility. Hemi mekem sevei long Vanuatu, Kiribati mo Tonga.
Ova 1000 woka mo 1600 haoshold blong Vanuatu we oli pat long sevei ia mo oli kivim ol tinktink blong olgeta folem sisonal woka program ia.
Ripot ia i soem aot se prokram ia hemi helpem plante long ol Pasifik woka ia long saet blong mitim haoshold nid mo helpm komunity blong olgeta.
Mo tu oli woka oli talem se oli kat wan gudfala experiens taem oli pat long skim prokram ia.
Wan author blong ripot ia we emi stap long World Bank, Dung Doan, hemi talem se i kat ekoknomik mo sosel benefit long laef blong ol woka.
Ms Doan i talem se ol woka long Vanuatu oli save mekem 9 to 10 times moa long ol salari we oli save mekem long kantri. Mo tu oli woka save savem 60 per cent blong salari blong olgeta.
Be hemi talem se ripot i findem sam isu we ol woka i bin facem. Isu ia includem we mani i bin takem aot long salary blong ol woka, taem we ol woka i no gat gudfala hour blong wok, mo mani we oli karem i no meetum expectasen blong olgeta.
Komisina blong Dipatment blong Leba, Murielle Metsan Meltenoven, hemi talem se samfala impact blong program ia hemi shotej blong ol woka long kantri mo absent blong ol man folem man pawa wok we ol komunity i nidm long ol taem blong disasta.
“Long mi, sevei ia hemi important blong save helpem gavman blong yumi as well as gavman blo ol narafala kantri we oli participate long program blong shapem gud ol policies blo olgeta, ol futa polici blo beta rispon lo ol isu we i stap,” hemi talem.
Ripot ia oli presentem long Pacific Labour Mobility Annual Meeting we tekem ples long Port Vila.
I bin kat fulap toktok long saed blong ol social, labour mo family impact blong seasonal wok, mo I gat sam pipol we oli no agri long ol finding blong ripot ia.
Chairperson blong Pacific Island Council blong Trade Unions i talem se hemi no agri long ripot ia.
Hemi talem se oli mas stop lo ting se evri samting i stret taem ol Pasifik kantri oli sendem ol pipol blong woka long narafala kantri.
Samfala nara pipol tu long confrens oli talem se ripot ia hemi no fitim samfala concerns we ol sisonal woka oli bin talem long olgeta mo oli askem blong World Bank mo ANU i mas mekem wan nara sevei we i showem relity blong ol woka.
