Labour Department i talem se olgeta Recognise Seasonal Employment wokman (RSE) we oli wantem kontinu blong wok long New Zealand blong nara six manis bae oli save aplae blong ekstendem taem blong wok blong olgeta.
Minister blong Immigration long New Zealand hem i yusum pawa blong hem anda long immigration amendment act we hem i rilate long COVID-19 blong mekem ol jenis ia. Mein tingting hem i blong kivim assurance long olgeta woka se oli save kohed blong wok long ol taem we i kam.
Hem i minim se ol rikwaemen blong olgeta woka blong oli mas aot long kaontri bitwin ol season hem i nomo gat from COVID-19 travel restriction.
Commissioner blong Labour, Murielle Meltenoven, i talem se “I gat ol extensen we oli aveilebol blong eni wan we hem i wish blong kontinu blong wok long New Zealand beyond karen visa status blong olgeta.”
“I gat sam grup blong ol RSE woka blong yumi we oli bin willing mo wish blong stap nomo blong wok long summer season blong yumi ia from afta long ol repatriation we bae i kam ia, mi no tink se bambae ol citizen blong yumi bambae oli save kobak. Wetem COVID-19 status ia bae oli no save kobak from ol boda blong yumi tu i klos yet,” Mrs Meltenoven i talem.
Hem i talem se RSE scheme ia bae i stap semak mo olgeta we bae oli stap bak blong wok, oli save saenem ol niufala contrak.
“Ol kondisen blong ol kontrak blong olgeta bambae yumi wok tugeta wetem New Zealand Kavman mo ol mission blong yumi from long en blong dei bambae emploia wetem New Zealand Kavman mo ol wokman ia, bambae olgeta nao oli ko tru long ol kondisen blong contrak blong olgeta blong identifaem,” hem i talem.
Commissioner Meltenoven i talem se “Mi bilif se bambae ol sem kondisen blong contrak bae hem i stap semak mbe prioriti blong ol emploia hem i blong oli providem ol sef equipmen mo oli mekemsua se ol wokman blong yumi oli olwes stap long wan sef enviromen blong wok.”
Hem i talem se eventou namba blong ol wokman we oli wantem stap bak long New Zeland blong wok hem i no klia yet, sam oli expresem intres vinis blong oli kohed blong wok.
