Niu Australian Hae Komisina long statem Wok long Vanuatu
Niufala Hae Komisina blong Australia long vanuatu, His Excelensi Max Wilis i presentem Leta blong hem finis long President blong Repablik, His Excelensi, Nikenike Vurobaravu.
Taem hemi toktok long seremoni ia, Hae Komisina Willis i talem se hemi gat ona blong save kam long Vanuatu mo hemi hapi long gudfala welkam we hemi kasem.
Long toktok blong hem long Bislama, hemi se Australia hemi praod long gudfala frensip wetem Vanuatu.
Hemi se relesensip blong vanuatu mo Australia hemi no long level blong Gavman nomo mbe hemi gat tu long level blong Kalja mo Pipol.
Hemi se patnership blong tufala kauntri hemi stat befo independens long ol eria olsem Ekonomik, Helt, Education, Infrastrakja, securiti mo klaemet jens.
President Vurobaravu i talem se apointmen blong His Excelensi Willie ikam long taem we relesensip blong Vanuatu mo Australia hemi strong gud.
Hemi talem tankiu long Australia from ol wok we hemi mekem long kauntri olsem long saed blong Education, Helt, Infrastrakja Developmen mo preperesen blong disasta.
President Vurobaravu ise olgeta wok ia hemi gat wan bigfala benefit long laef blong plante Ni Vanuatu mo kauntri i hapi long hem spirit blong solidariti we Australia istap soem.
Mr. Willis hemi wan senior ofisa long depatmen blong Foren Afea mo Trade.
Ino longtaem i pas hemi bin wok olsem fes asisten secretari Melanesia Divisen long ofis we i lukaotem pasifik.
Hemi bin wok long Solomon Island, United States mo Papua New Guinea.
