Monday, July 15, 2024
29.8 C
Port-Vila
Monday, July 15, 2024
More

    Inkris long propeti tax i afektem bisnis long Port Vila

    Samfala propeti ona i sapraes blong lukim amount blong propeti tax bill long seken semesta ia i go antap bigwan. 

    Olgeta i talem se amount blong propeti tax ia hemi dabol o tribol bitim blong fes semesta long yia ia mo oli askem from wanem jenis ia i hapen.

    Port Vila City Kaonsel hemi talem se i no kat eni inkris long rate blong 5.5 per cent ia be valuasen blong propeti i go antap mekem se i kat inkris long propeti tax bil long yia ia.

    Acting town clerk blong kaonsel, Johnny Botleng, i talem se i bin gat wan nid blong updatem ol infomesen long saed blong valiu blong propeti.

    “Port Vila Municipality hemi wok in relesensip wetem valuer general long Ministry blong Lands blong mekem assessem,” hemi talem.

    “Mifala i kat wan database we hemi outdated since 2014 finis, in fact to 2008 we wan hemi fulap propeti mifala no valuem olgeta according long ol rates blong olgeta. Valuesen blong wan propeti hemi inkris evri yia.”

    Valuasen ia bae i soem ol jenis long ol propeti mo kaonsel i talem se bae i mekem long wan fasin we i fea long ol propeti ona.

    Mr Botleng i talem se ol propeti ona long centa blong city bae oli lukim wan bigfala inkris long propeti valiu.

    “Blong talem stret ol valu blong ol propeti ia, wan wan propeti kat defren rates ia i no sem wan.

    “Ol commercials mo ol residents oli kat ol different rates compare long olgeta long suburb olsem Freshwota, Anamburu bae oli luk very low rate from propeti blong olgeta valus blong olgeta hemi low compare to ol CTB (Central Tender Board).”

    Prinsipol valuer ofisa blong Ministry blong Lands, Peter Pata, i talem se ministry hemi mekem ol valuesen blong ol propeti mo sabmitim ol valu blong propeti i go long city kaonsel.

    Sam pipol i bin resem objeksen long kaonsel abaot inkris blong tax bill, mo memba blong palemen we i representem Port Vila konstituensi, Ralph Regenvanu, hem i bin raetem long kaonsel tu blong askem blong wan explenesen.

    Hon. Regenvanu hem i gat konsen yet long saed blong olsem wanem kaonsel i bin yusum kalkulesen blong olgeta propeti we Ministry blong Lands nomo i bin mekem.

    “Invoice we oli sanem long yumi naoia oli putum invoice be olgeta no kam luk propeti tu, i nokat eni ofisa blong city kaonsel i wokbaot blong lukluk ol propeti mo scalem se wanem propeti hamas bae costem,” hemi talem.

    “Oli tekem raw valu nomo long lands department mo mekem propeti tax so hemi no wan proper assessment. And land value mi blong 2014 klosap 10 yias ago so mi kat konsen from kat fulap ol Chinese shops for example big niu buildings.

    “Be bae oli no jajem olgeta long niu building ia from oli stap folem wan valu blong 2014 weh valu i no exist yet. So hemi no really wan proper wok weh oli mekem oli mas wokbaot blong luk evri propeti.”

    Wetem olgeta jenjes blong valuesen naoia kaonsel i talem se bae i yusum mane ia blong impruvum infrastrakta mo seves long city olsem footpaths, streetlights, cemetery mo garbej koleksen.

    Kaonsel emi kivim moa taem yet naoia kasem 30 Septemba long yia ia sapos eni propeti ona i wantem mekem wan apil.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen