Kavman blong Australia i talem se bae hemi pem cost blong ol flaet mo kwarentin blong ol Ni-Vanuatu, we oli ko long Australia anda long ol program we hemi fundem.
Spokesman blong COVID-19, Len Tarivonda i talem se hemia, hemi olketa pipol we oli wantem stap kambak long Vanuatu.
Hemi talem se kavman blong Australia i konfemem se bae hemi lukluk long eni ni-vanuatu we oli stap long Australia naioa, olsem ol wokman blong Seasonal Workers Program, ol wokman blong Pacific Labour Scheme, ol studen we oli stap stadi mo eni wan we i bin travel long wan Australian funded program mo hemi stranded long Australia.
“Hemi olsem wan rilif long Kavman blong Vanuatu mo wan gudfala nius blong olketa famili blong ol Ni-Vanuatu long Australia mo Vanuatu,” Mr Tarivonda i talem.
“Help ia, bae hemi kam antap long sam komitmen we kavman blong Vanuatu mo Australia, long saed blong cost we i stap yet blong pem olsem kwarentin blong fes repatriation.
“Mo Australia i kam blong helpem kavman blong Vanuatu long COVID-19 respons blong hem.”
Minister blong Finance mo Economic Management, i talem se kaon blong ol kwarentin cost blong fes repatriation hemi cost araon VT 71 Million, mo hemi duti blong kavman blong pem aot.
“Kaon ia hemi stap long olgeta hotel mo resort long Port Vila, we kavman hemi bin yusum olgeta olsem eria blong kwarentin mo hemi no afektem proses blong seken repatriation,” Minister Koanapo i talem.
VBTC i kasem infomesen se isu blong kwarentin nao, hemi wan long ol consen we COVID- 19 Advisory Committee i gat.
Mr Tarivonda i talem se committee i stap wok wetem ol hotel mo resort owna mo asurem everi wan se, kavman i stap explorem ol opotuniti wetem ol developmen patna blong hem vinis, blong help sotem aot outstanding mani ia we i stap, mo mov i ko long seken phase blong repatriation.
Minister Koanapo i talem long VBTC se, dilei blong paymen ia, hemi from kavman i mas folem proses blong yusum pablik mani mo hemia i tekem taem.
Hemi askem olketa pipol responsible blong oli mas ariap long ol wok, blong pasem ol invoice ia long Department blong Finance.
Ol sos blong VBTC, i talem se wael Australia hemi mekem comitmen ia finis, New Zealand we hemi gat wan bigfala namba blong ol Ni-Vanuatu i stap long hem, olsem ol wokman blong Recognised Seasonal Employer , hemi no mekem eni anonsmen yet.
Ol sos blong VBTC, i talem se maet New Zealand, bae hemi no mekem kaen arejmen olsem from hemi wantem givim commercial opotuniti ia long Nasenol Airline blong Vanuatu, Air Vanuatu.
