Tropikol Saeklon Lola i bin kam tru long Penama provins long Tusdei naet.
TC Lola i kam daon long katekori 4 long apdeit blong Vanuatu Meteorology mo Geo-Hazards Department (VMGD) long 6pm Tusdei mo kam doan bakeken long katekori 3 long apdeit long 6am Wednisdei.
Penama, Malampa mo Shefa provins i stap long red alert.
Tafea provins i stap long blue alert.
Torba mo Sanma provins i no gat alert naoia.
Long apdeit blong VMGD long 9am Wednisdei, TC Lola i stap long east southeast blong Malekula mo north north-west blong Epi. Hemi stap long senta left blong skwea leta 1, namba 7 (1,7) long Tropikol Saeklone Traking Map.
Vodafone hemi konfem se olgeta network i daon noaia long plante eria long Torba, Sanma, Penama mo Malampa provins.
Mr Thomas Bruce, CEO Vodafone, hemi talem se oli bukum finis flaet, blong travel i go long ol ples ia blong lukluk long ol damej taem weta hemi clear.
Hemi talem se oli stap contactem helikopta seves tu blong assistim olgeta long saet blong assessment mo restoration.
Be olgeta bisnis or gavman ofis long ol provins we oli kat access long satellite sistem blong olgeta oli shud save usum blong komunicate. Satellite network hemi Kacific Satellite network.
Mr Bruce i talem se bai hemi wan immediate action we bai oli tekem blong restorem ol network taem weta hemi clear from bai olgeta long helt emergenci oli nidim too blong komunicate.
VBTC bai hemi apdeit long network blong Digicel long ol hour we i stap kam.
