Monday, July 15, 2024
25.5 C
Port-Vila
Monday, July 15, 2024
More

    Flood i afectem pipol

    Leftenant Kako i talem se oli rispon folem kol blong ol famili long eria ia.

    Operation Maneja long Vanuatu Mobile Force, Leftenant Johnny Kako i talem se long Wednesday aftanun, oli muvum araon ova 50 pipol long Prima mo Melematt vilij.

    Leftenant Kako i talem se oli rispon folem kol blong ol famili long eria ia.

    “Long Melematt, mifala i muvum aot 20-30 pipol.”

    Cyclone Dovi-Mele mat

    “Mifala i rispon nomo from National Disasta Management Ofis i no rispon gud yet, so mekem se mifala i beis long wok blong sevem laef mo propeti so mekem se i ko putum olgeta long ol sef ples nomo blong oli stap long hem.”

    Ol Mobile Fos oli bin help mekem awenes mo toktok wetem ol komuniti we oli stap kolosap long ol low lying eria blong muv aot before tutak.

    Long Teouma, ova 100 famili i muv i ko silip long Eratap Eria Kaonsel haos folem bigfala flood. Jif Toka Kahipa long Teouma Valley i talem se “Mi sori bigwan long ol pipol blong mi. Riva i kam koko i ko insaed long ol haos, mo hemia i kasem fo mita.” Eria blong Teouma i kat ova 100 pipol we oli liv long plesia ia.

    “Samples 2 -3pm olsem, Polis i muvum aot mifala mo wan lawyer i help blong pem kakae blong mifala. Sapos 1 o 2 wik i pas, mi no tink pa mifala i kat kakae from evri manioc, cabij mo banana i ko long wota. Mifala i stat katem aot ol banana fruit mo tekem aot ol manioc mbe pa ol kakae ia i nosave stap kasem tu wik taem ia.” Jif Kahipa i kolem ol othoriti blong helpem pipol long taem naoia.

    Jif Kalipa i talem se sam famili long Teouma i ko silip wetem ol famili long Eratap vilij, Erakor mo Ohlen. Flood i hapen tu long ol eria blong Tafea provins mbe VBTC Nius i no kasem eni infomesen yet.

    VBTC Nius i witnesem tu mama we tufala i kobak long haos blong tufala long Teouma blong kuk mo help fidim ol famili we oli stap long evacuation senta long Eratap

    Disaster Coordinator blong Red Cross, Augustine Garae, i talem long VBTC Nius se tim i stap visitim ol evacuation senta blong faenem ol prioriti nid blong pipol bifo oli save help.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen