Praem Minista Charlot Salwai Tabimasmas i talem se evri Comission blo Inquiry (COI) we gavman i putum, bai oli mekem sua se i kasem en blong hem.
VBTC Nius i kasem se COI blong VT1 bilien blong Ambae Rod i stap long hand blong polis naoia, mo oli stap investigatem.
Long tedei, Tuesde 17 October, Polis i mekem sej long home blong Hon. Jay Ngwele long namba 2 eria long Port Vila.
I gat ova long 10 polis ofisa i ko insaed long premises ia blong ko tru long ol record long hom blong hem.
I gat wan COI tu i stap gohed folem tu sip blong Vietnam we i stap long kaontri wetem allegesen i stap againsem sam lida, we oli talem tu Hon. Salwai insaed long hem.
Las gavman i putum inquiry o kwestin ya.
“Commission of inquiry bai oli continue,” Hon. Salwai i talem.
“And (mo) hemia blo Ambae, mi save se wanem we ol polis oli stap wok lo hem ino finis yet. From oli nid blo golo aelan blo Ambae, oli nid blo golo Pentecost (lo) ples we oli harem ol stori oli stap lem, bifo oli completem.”
Hemi talem se sipos i gat kes, bai oli gohed blong wok wetem ‘Prosecutor’.
“Understanding blo mi wetem polis, mi save se wok i sta go on yet,” Hon. Salwai i talem.
“Ol narafala commission of inquiry tu bai oli continue. Even i gat wan, from we oli jes mekem lo tufala bot i silip aotsaed ya tu. Hemia tu mi welkam blo oli completem.
“I gud blo pipol i save se wanem stret. I nogud se samfala, ol samting oli no klia lo olgeta.
”Hemi gud blo bai oli continue blo wok.”
Praem Minista Salwai i talem tu se bai oli tokbaot smol long hem long wik ia, folem isiu blong raet blong mackerel raet blong Vanuatu.
Hemia we i kat allegesen se wan top lida i stap anda investigasen from sel blong raet ya.
“I gat wan declaration we gavman bai hemi kam blo mekem, afta we i gat better understanding lo hem.
“I gat sam niu minista. Mi tu mi kam insaed, mo mi no familiar lo hem.
“Bai i gat wan taem we bai mifala i kamaot lo hem, lo isiu ya,” Hon. Salwai i talem.
Long toktok blong hem long Mande aftenun yestete, hemi talem tankiu i go long olgeta otoriti blong holemtaet pis long taem blong olgeta political instability isiu we i go hed.
Hemi stap lukluk blong work tugeta wetem oposition long yia we i stap kam.
Hemi talem se oli stap mekem workbout naoia blong luk i kat political stability.
“Taem lo eleksen blo mi, priority blo mi emia nao blo lukluk lo stability we yumi so nidim lo kantri. From yumi vulnerable finis lo ol disasta.
“Be taem yumi stap createm ol politikol instability, i min se emi ol man-made disasta we yumi sta mekem. And hemi no helti blo helpem developem blo nason.
“Gavman bai hemi sta wok. I stat finis blo adresem ol bil ya we i adresem politikol instability. Be bai hemi welkam moa evri politikol pati, mo oposison taem hemi fom, blo hemi wok wetem olgeta,” Hon. Salwai i talem.
