Minista we hemi responsibol long spending blong Gavman, Hon. John Salong hemi stopem paymen blong ol voucher we Pablik Service Komision hemi wantem givim olgeta Krismas rewod blong ol civil servant.

PSC hemi infomem finis olgeta wokman blong Gavman se bae hemi presentem VT50,000 voucher iko long wanwan long olgeta blong mekem shopping long 4 outlet.

Hon. Salong i talem se Pablik Service hemi no gat raet blong spendem money we Gavman hemi no putum long Budget blong 2023.

Voucher ia hemi blong spendem long 4 shop hemia long Port Vila, Luganville, Lenakel mo Lakatoro.

“Fans we hemi involve hemi around VT450 million, hemi wan sabstansol amount blong mone and hemi no appropriated,” Hon. Salong i talem. “Everi expens blong mone hemi mas be appropriated, that’s why yumi gat appropriation bill we hemi kam budget.”

Hemi talem se once budget hemi pas, bae kansel blong olgeta minista nomo hemi save mekem ol jenses.

“Hemia I wan bigfala amount blong mone we hemi no akaont long wan COM pepa mo hemi no pas olsem wan Budget. Sapo soli wantem rewodem ol woka from gudfala wok we oli mekem, oli mas putum olsem wan Budget blong 2023. Mbe oli no mekem. That’s why mi stopem,” Hon. Salong i talem.

Hemi gohed blong talem se naoia i leit blong  aloketem eni money iko folem notis we PSC hemi givim.

“Long namba 15, Budget yia istap klos and hemi no jastifaed tu. Yumi nidim wan acountabol Bodi and I tru se ol pablik servant oli desevem kaen riwod olsem from gud wok mbe hemi blong wan independent bodi I givim mbe ino pablik service I givim,” Hon. Salong i talem.

Hemi talem se igat olgeta nara Komision tu istap mekem gudfala wok tu semak.

“What abaot polis service komisen, what about Tijing Service komisen. Olgeta ino mekem gud wok,” hemi talem.

Hon. Salong hemi se fasin we oli jusum olgeta shop we voucher ia hemi kam long olgeta ino stret.

“Wei we oli mekem ol voucher ia bae i benefit 4 kampani. Mbe ino pas tru long sentrol tender bod. So no. ino raet nomo. Igat tumas kuesten long hem,” Hon. Salong i talem.

Jeaman blong Pablik Service Komisen, Martin Mahe i talem se i Komisen hemi riviwem finis notis ia beis long konsen blong Hon. Minista.

Hemi se bae PSC hemi alowem actual cash nomo i ko insaed long account blong wanwan wokman.

Mr Mahe i kliarem tu se VT50,000 hemi olsem wan ceiling, mo bae wanwan laen depatmen bae hemi desaed long amount.

“Bae money ia hemi kamaot long budget blong wanwan laen depatmen mo bae hemi disburse depending long availability blong funds,” Mr Mahe i talem.

Hemi talem tu se: “Hemia ino festaem we Komisen hemi rewodem olgeta wokman. Hemi happen befo finis we PSC hemi enkarejem ol laen depatmen anda long wanwan Ministri blong helpem ol wokman.”

Mr Mahe i talem se olgeta wokman ibin go tru wan jalensing yia wetem ol natural disasta olsem saeklon.

“Yumi save se plante we oli wok long ol provins we saeklon I afektem olgeta bae oli faenem I hard naoia, so eni smolsmol money we oli risivim, weta 5,000 or 10,000 or 50,000 hemi blong helpem olgeta,” Mr Mahe i talem.

“Mi wantem lukim se ol wokman I enjoyem feastive sisen ia mo wishim olgeta wan Merry Krismas tu,” Mr Mahe i talem.