Port Vila Maket haos long taon hemi fanalisem ol niu praes blong lokal kakae mo redy blong usum ol skel long nekis wik.

Hemi ova 6 manis nao we maket ia hemi lonjem ol skel blong skelem kakae, be oli no bin save usum from fulap toktok we i kamout we i tokbaot ol price mo i bin kat wan strike i bin tekem ples long July.

Wetem sapot blong Port Vila Municipaliti bae maket haos oli releasim ol praes we ol maket venda bae oli usum stat blong usum nekis wik long namba 2 January.

Port Vila Minisipol Maket Maneja, Sacha Watt hemi komen se oli wantem informem ol maket venda mo public se taim yumi kam insaed long market stat long nekis wik mo yumi no mas wari o fraet blong usum eni skel we i stap long flo blong maket.

“Mifala bin kat ol miting long praes monitorin mo printm aot ol list blong ol niu praes, mo tu mifala bin putum raon finis long market and bae mifala lukluk too blong providem seves long ol market vendors follem wanem we i stap lo list.”

No mata se Maket Manejmen hemi talem se oli mekem konsaltesen finis blong praes be i kat olgeta sam maket venda we oli no agri nomo long ol niu praes ia.

Sam long ol maket venda ia oli i talem se oli no agree long sam praes blong kakae.

Wan mama we stap salem kakae long market hemi talem se i kat sam weh i gud mo sam we hemi low tumas.

“Be from nomo se mifala hardwok long karen, mifala bras mo samtaim mifala pem ol man blong wok long karen mo blong karem kaikai kam lo market tu emi sas tumas,” hemi talem.

Wan papa tu hemi serem semak konsen blem se taim hem i pas long ol stoa hemi lukim ol praes blong kaikai hemi bigwan be long maket haos tu i mas semak, eno minim se pa oli mekem blong stoa emi bigwan afta blong ol fama oli smol.

I kat wan nara farma we hemi salem pineaple long maket i talem se wan long ol bigfala jalenj hemi long saed we hemi stap producem moa blong mitim hae deman.

“Taim mifala kolo scale bae mi luk hamas kakae mi kat mo sos hemi semak praes olsem ol narawan, sipos no bae mi westem kakai nomo mo bae mi nosave planem fulap nekis taim,” hemi talem

Pineaple fama ia hemi talem moa se sipos yumi mekem stret praes blo wan kakae we evriwan i usum semak nomo bae mekem se pa hemi save hamas nao hemi nid blong plaem mo hamas mane hemi save winim.

Maket Maneja, Mr Watt hemi toktok se oli bin mekem fulup konsaltesen blong putum olgeta praes ia.

“Afta we mifala bin mekem namba 2 list blong praes mo lisen long ol venda mo semak time no mas forgetm tu ol kastoma from se ol kastoma nao oli stap kam insaed blong pem kakae long maket.

“Sipos yumi wokem putum praes kontrol long market ia pa ol man oli stop kam mo kolo nara ples mo ol man we sta salem kakae long maket ia pa oli lus bigwan.”

Sam memba blong pablik long maket oli agri se i mas kat kontrol long ol praes blong maket.

Wan papa hemi talem se hemi luk se ino wan gudfala fasin blong yumi mekem ol kakae oli sas bagegen blong yumi nomo we yumi stap long kantri ia.

“beh taim yumi luk fasin blong introdusem skel long maket me tinkse emi moa propa se evriman oli mas usum scale blong yumi save pem kakae.”

Wan konsen mama hemi tok tu se i kat sam man we oli kat mane mo i kat sam we oli nogat.

“Olgeta we oli nogat mane bae oli kam lo maket beh bae oli nosave pem kakae weh you scalem lo Vt1000,” hemi talem.

Manejmen blong maket haos oli trustem se oli bin kat enaf konsaltesen finis mo oli redi blong usum skel stat long nekis wik January namba 2 mo oli expectim blong introdusem tu long Manples mo Korman maket ples.