Cruiship kampani we hemi sendem ol turis bot iko long Mystery Aelan, Carnival Australia hemi redi blong hemi investem ova VT2 bilien long niufala turis projekt long aelan ia.
Hemi ova 40 yia nao we turis bot istap ko long aelan ia nomata we ol fasiliti blong hem i poor mo Gavman hemi desaed blong help tu blong fasilitetem ol storian blong projekt ia i hapin.
Niufala projek ia hemi blong putum ol gudfala infrastrakja long aelan ia we hemi stap olsem wan long ol top 5 turis destination long Pasifik.
Repot i talem se ol aelan jif i agri long proposal ia mbe oli mekem sam recomendesen tu blong lukluk long hem befo projekt ia hemi stat.
Wan delegesen blong gavman we Fes Politikol Advaesa blong Ministri blong Jastis mo Komuniti Seves, Mr Russel Ngari i lidim, hemi mit wetem olgeta jif mo pipol blong Aneitym long vilij blong Anelcuata long manis ia blong toktok moa long projekt ia from Desemba ia hemi las manis blong oli mas kasem wan agrimen.
“Pepes we mifala iko daon from deadlaen blong apruval blong projekt ia hemi long manis,” Mr Ngari i talem.
“Hemi wan samting we sapos yumi no agri long hem bae investmen ia hemi save ko long wan diferen kauntri. Ibin gat sam dispiut istap mekem se mifala imas ko daon blong help solvem isiu ia,” Mr Ngari i talem.
Jif representatif blong aelan blong Aneitym, Reuben Neriam i talem se wael ol jif i agri long proposal ia, mbe igat sam samting we oli wantem Gavman mo Carnival Australia hemi wok long hem festaem.
“Mifala i lukim projekt ia bae hemi helpem mifala mbe igat sam samting insaed long projekt proposal ia we hemi no comply wetem Custom Land Law,” Jif Neriam i talem.
“Igat strong toktok long miting ia mbe from ol infomesen nao ino klia mo igat sam concern long wanem kaen developmen bae i hapen from mifala i karem advaes tu long ol Depatmen olsem Environmen,” Jif Neriam i talem.
Normal operesen blong turism long Mystery Aelan bae, Mystery Island Tourism Holdings Limited nao hemi ranem long wan interim basis kasem niufala kampani hemi tekem ova operesen.
Nafakarau Island Kaunsel blong olgeta Jif mo pipol blong Aneitym ibin mekem wan kastom dekleresen tu se bae ino gat eni customary Land long aelan blong Aneitym ikam anda lease agrimen naoia or long fiuja.
“Aneitym wetem ol pipol blong hem ibin mekem wan dekleresen samtaem iko finis blong bae i neva gat wan lis long custom land, mekem se blong projekt ia i gohed miting hemi desaed se developmen managemen bae ikam anda long wan spesel agrimen betwin lokol kampani we Jif i ownem mo pipol blong Aneitym wetem developa,” Mr Ngari i talem.
Kampani ia bae hemi manejem niufala Mystery Aelan projekt wetem transparensi mo accountabiliti blong save benefitim ful population blong Aneitym.
Representatif blong Carnival Australia, Adrien Mooney we ibin pat long delegesen ia tu, i talem se kampani hemi plan blong bildim wan market haus we ol mama i save salem ol craft mo artifact we i includim ol prodakt blong ol nara aelan long sentrol mo North blong Vanuatu.
Bae igat wan sentrol entertainmen senta, ples we ol turis i kakae tugeta mo ol smolsmol haus we pipol isave iusim blong ranem ol business.
Mani bae hemi ko insaed long niufala local trust.
Mr Mooney i talem tu se bae igat 4 bigfala bot we isave tekem 30 pasenja long wan taem oli travel raon long aelan blong Aneitym blong lukluk ol nara ples long aelan ia.
Hemi se everi tour we ol lokol i mekem bae oli salem long cruiship blong mekem se ino gat problem wetem ol tour opereta or visita.
Hemi asurem pipol blong Aneitym se infrastrakja projekt ia taem i complet, bae moa cruiship mo bigfala boat isave go long Mystery Aelan.
