Wota Projek long Saratamata emi stap ko hed naoia.

Pipol long Saratamata mo ol komuniti blong Lolowai, Navonda mo ko kasem Logana airport, bai oli save kat inaf wota blong usum tru long projek ia.

Wok blong Saratamata wota Expansion projek emi wan wota projek weh i kamaot long Recovery program blong TC Harold.

Fesfala phase blong wota project ia emi stap long Provincial Headquarter long Saratamata.

Mo seken phase blong project ia nao ol contractor mo wota department oli stap wok long hem naoia.

Wota expansion projek ia hemi go tu long ol nara komuniti olsem Lolowai, Navonda mo ko kasem Logana airport.

George Billy olsem Akting Wota Supervisor long Penama Province i talem se wota projek wok long lolowai i kasem 90% long eria ia finis mo hemi talemaot ol construction wok weh i stap ko hed noaia.

Emi longtaem hope blong pipol long area ia blong kat gud akses long wota afta weh oli stap usum anda kraon well wota mo ren wota nomo.

Wota source blong projek ia hemi long Saratamata, be lukluk i stap blong mas lukaotem wan nara sos blong wota .

Mr. Billy emi gohed blong talemaot ol challenge weh wota department i stap fesem blong karem aot ol wok olsem.

Wetem ol wok weh i stap ko hed naoia, lukluk i stap se bai wota projek ia bai emi komplit long nexis yia 2025.

Kavman blong Australia tru long DFAT Program nao emi fundem wota project long Saratamata.