Nasonal Disasta Manejmen Ofis (NDMO) hemi konfem se ol kakae blong disasta rispons blong volkeno asfall long Tanna bae hemi kasem ol pipol long nekis wik.

Tim blong NDMO oli stap wet nomo long Sentrol Tenda Bod blong kivim apruvol blong pem ol kakae we i stap long list blong distributem i ko long ol viktim blong Tanna volkeno asfall disasta.

Kaonsel blong Minista oli bin apruvum finis bajet blong disasta rispons long Desemba las yia follem decleresen blong volkeno asfall olsem wan disasta from bigfala impak mo risk blem long aelan ia.

Kontrola blong Nasonal Emejensi Operesen Senta long NDMO, Ken Mana i talem se 80% long disasta riapons plan blong Tanna volkeno asfall disasta hemi redi vinis.

“Yumi stap wet nomo long las pat blong hem noaia we hemi prokumen proces blem we i folem proces blong tenda bod folem ol hae value goods we yumi mekem,” Mr Mana i talem.

“Hemia emi olgeta long tenda bod we oli nid blong oli pasem fastaem, kivim ol approval blong olgeta bifo yumi kivim ol approval blong purchasem ol kakae.”

Asis blong volkeno hemi damajem bigwan ol karen, mo ol sos blong wota we pipol i usem mo kolosap 12,000 pipol long east mo saot-east Tanna, i kasem bigfala impak blong volkeno asfall.

Mr Mana hemi konfirm tu se wan planing tim blong NDMO bai oli ko long Tanna long Tusdei blong briefem sekreteri jenerol blong Tafea long wanem wok we bae oli mekem long ol wik we i stap kam.

Rispons tim bai oli distributem kakae nomo, mo bai i kat eight cluster tim we oli part long respond tim ia.

“Ol kakae we bai yumi kivim i ko long ol famili blong yumi long Whitesands, yumi stap kivim rice; ol 18Kg bag, yumi stap kivim tuna; ol canned tuna ia, yumi stap kivim ol cracker; ol 5Kg packet breakfast cracker ia, and yumi kivim olgeta wota insaed long wan cateen, emia blong 1.5 liter,” hemi i talem.

“Klasta we bai oli rispon mo sapotem yumi long asfall rispond ia, yumi kat olgeta long logistic klasta, helt, food sekuriti, FSAC, wota, genda wetem olgeta long publik infrastrakja, edukesen mo displesmen and evakuasen.”