Counsel blong Minista i desaed blong askem President i disolvem namba 13 Palemen.
Counsel blong Minista oli bin mit long Fraedae moning mo desaed blong requestem Presiden i disolvem palemen.
Hemi tekem 13 Manis (393) sins we snap jenerol eleksen ia hapen long Oct. 2022 afta long disolution blong palemen.
Disolution blong namba 12 Legislature ibin tekem ples long Okis afta long instabiliti mo Motion aikensem Praem Minista long taem ia, Hon. Bob Loughman.
Hed blong State, HE Nikenike Vurobaravu ibin muv blong disolvem Palemen long request blong council blong olgeta Minista long taem ia long namba 18 Okis 2022.
Snap eleksen hemi hapen long 13 Oktoba we i lukim Hon. Ishmael Kalsakau hemi kam niufala praem minista.
Politikol Instabiliti hemi stat bagegen long manis May, we hemi 2 manis afta long twin Saeklon Judy mo Kevin.
Long namba 19 May Praem Minista Ishmael Kalsakau hemi fesem fes Motion blong inogat trast aikensem hem.
Lida blong Oposisen, Bob Loughman hemi witdrawem Motion ia bagegen long floa blong Palemen from hemi no karem sapot.
Long 15 June, Praem Minista Ishmael Kalsakau i sakemaot Depiuti Praem Minista blong hem, Hon Sato Kilman Livtunvanu.
Long namba 2 Okis, igat wan moa Motion blong inogat Trast long Praem Minista Kalsakau hemi regista long Palemen we 28 MP i kolem wan extra-odineri siting blong palemen i tokabaot motion ia.
Long namba 6 Okis, Praem Minista Ishmael i mekem wan muv blong holem taem coalition blong hem mo hemi apointem memba blong Santo Rural Samson Samsen ikam niufala Minista blong Trade.
Long wan sapraes muv, hemi lukim President blong Lidas Pati blong Vanuatu, Hon. Jotham Napat hemi step daon olsem Minista blong Foren Afea mo givim Potfolio ia long Hon. Matai Seremaiah we hemi kam deputi praem minista.
Semtaem tu hemi apointem Hon. Christopher Emelee ikam Minista blong Education blong tekem ples blong President blong National Unaeted Pati Bruno Leinkone we hemi stap ko tru long Medikol Tritmen long Korea.
Long taem blong namba 2 Motion aikensem Hon. Kalsakau long namba 10 Okis, igat 25 memba blong Palemen long Oposisen i stap insaed long Palemen. Gavman hemi boycot.
Spika, Semeon Seule hemi adjonem palemen long 3 Dei.
Long Wednesde 16 Okis, isiu blong Namba ikam insaed long palemen wetem anaonsmen blong Spika, se Hon Bruno Leinkon we istap oversea i lusum Jea blong hem.
Hemi putum ikam long questem toktok ia “absolut” majoriti.
Afta long Vot blong Motion Spika, Semeon Seule hemi rul se 26 vot hemi no wan absolut majoriti i mekem se Praem Minista Ishmael Kalsakau hemi gohed blong lidim Gavman wetem 23 MPs aikensem 26 blong oposisen.
Oposisen hemi tekem kes ia iko long Kot.
Long namba 18 Okis, Oposisen hemi putum wan Motion blong remuvum Spika blong Palemen Semeon Seule.
Long namba 25 Okis, Suprim Kot hemi deklerem se Motion blong ino gat Trast aikensem Hon. Kalsakau hemi. Semtaem Judge hemi putum wan Stay long desisen blong alowem sapos Spika hemi tingting blong mekem wan Apil.
Long namba 4 Septemba Apil Kot i rul blong apholdem desisen blong Suprim Kot se Motion ia hemi pas.
Palemen hemi mit mo apointem Hon. Sato Kilman olsem niufala Praem Minista.
Long namba 20 Septemba atempt blong remuvum Spika, Semeon Seule hemi no hapen from ino gat quorom. Oposisen hemi mekem wan boycot.
Long namba 22 Septemba Gavman mo Oposisen tufala i setap Camp bagegen mo wan Motion blong nogat tras iko long palemen aikensem Hon. Sato Kilman.
Long namba 2 Oktoba Palemen hemi mit bagegen blong debat motion aikensem Niufala Praem Minista, Hon Sato Kilman.
Igat 27 Oposisen i turn ap long Palemen, mbe ino gat quorom blong extra-ordineri siting ia hemi gohed.
Long Fraede namba 6 Oktoba, Palemen hemi elektem Hon. Chalot Salwai Tabimasmas olsem niufala Praem Minista.
Long Tuesday namba 7 Novemba, niuli elekted Praem Minista, Chalot Salwai hemi lukim fes motion blong nogat tras aikensem hem i lodged long Palemen.
Motion ia hemi schedule blong debate long Wednesday namba 15 Novemba.
