Attorney General, Kiel Arnold Loughman i talem se aksen we Vanuatu Teachers Union (VTU) i tekem long strike blong ol tija, i no risonable.
Long wan toktok wetem VBTC News, Mr. Loughman ise ol tija oli mas save se olgeta mani blong gavman, inkludem 4 bilian vatu we ol tija oli talem wetem eni narawan, I mas go long Palemen blong aprovem folem loa blong Public Finance and Management Act.
Folem loa ya, i no save gat mani we Gavmen I pem aot sapos Palemen i no givim apruvol blong hem.
Hemi se aksen blong ol tija i stap afektem raet blong ol pikinini blong go long skul, mo hemi impoten blong tingbaot fiuja blong kantri.
“Ol tija oli mas andastanem impak blong aksen blong olgeta. Oli no stap putum presa nomo long gavman, be oli stap afektem plante tausen pikinini we oli stap lusum raet blong Education,” Mr. Loughman i talem.
Hemi askem ol tija blong gobak long wok wael roundtable toktok iko blong verifyem olgeta kleim. Hem i talem se toktok hemi onli rod blong solvem problem ya, mo gavman i open blong mekem ol negoesesen.
Strike action ia i mekem ol skul long kaontri oli stop, wetem plante skul klas I gohed hafhaf.
Ol papa mo mama wetem ol stekholda we oli stap lukluk long edukesen long kauntri, oli stap expresem wari long strike we i gohed, mo oli askem blong faenem wan solution hariap.
VTU i klem se gavman i no bin pemaot ol aotstandin mani blong ol tija mo ol promes blong impruvum ol wok kondisen blong olgeta i no hapen, mo hemia nao I rison blong strike.
Mr. Loughman I talem se advaes blong hem istap yet se Strike Action ia hemi illegal.
