Shotej blong ol woka long kaontri bai hemi save afektem ekonomik growth long yia ia.

International Monetary Fund hemi wonem kavman long isu ia afta we oli pridiktim wan Gross Domestic Product growth blong 3.4% long yia ia.

Intanasenal okanaesen ia hemi kivim woning afta we hemi bin mekem anual konsaltesen blong hem long Port Vila wetem ol difren ajensi we oli stap kontriput long ekonomik growth long kaontri.

Ripot blong olgeta i statem se polisi blong adresem shotej mo impruvum laba maket kondisen hemi mas hapen ariap.

Oli pointem aut se wetem reopening blong boda, ki ekonomik sekta olsem turism oli stap fasem laba shotej, folem nomo se plante woka oli stap travel i ko ovasi.

Long wik ia laba dipatmen hemi openem rejistresen bageken blong ol woka we oli wantem travel.

Commisioner blong Labour Murielle Metsan Meltenoven, hemi konfemem long VBTC Nius se moa pipol we oli wok finis long kavman mo praevet sekta i stap ko ovasi.

Hemia olgeta skil woka, i kat konfemesen blong ol tija, ol helt woka mo turisim woka mo polis oli stap risean mo joinem wokfos long New Zealand mo Australia.

Tete bigfala consen hemi stap long ol skil woka blong kauntri we oli stap travel.

Fred Samuel wan komuniti lida long North Efate mo Director long Pacific Group Limited hemi statem se kauntri hemi mas keaful.

“Bifo yumi tekem Recognised Seasonal Employer mo Seasonal Workers Program yumi stap tingbaut olgeta we nogat wok, mbe naoia yumi stat blong luk intres blong olgeta we oli wok long gavman mo praevet sekta oli stap join tu,” Fred Samuel i talem.

“konsen blong mi se sapos trend ia hemi kontinu blong bilt ap mo taem ol program oli kontinu blong impruv i kam moa atraktiv blong ko ovasi, hemia naoia yumi kat wan isu.

“Sapos yumi no manejem gud bai yumi lusum sam long ol risosful pipol blong yumi i ko wok ovasi”

Director blong Vanuatu Skills Partnership, Fremden Yanhambath, hemi konfemem long VBTC Nius se i kat olgeta pipol we oli trenem long Tourism readiness program, oli bin travel aot afta we boda i open long manis July las yia.

“Yumi save se long saet blong mane blong program hemi wan plus long kaontri mo famili, be yumi mas tingbaut ol skil woka blong yumi,” Mr Fremden Yanhambath i talem.

“Ol smol komuniti projek yumi traem blong okanisem be taem yumi go long ol vilej i nogat ol yangfala,plante oli travel i ko ovasi.”

Mr Yanhambath hemi talem Labour dipatmen hemi mas faenem wan wei blong balensem mo manegem gud wok fos blong kaontri.

Naoia we i stap Labour mo ol Agents oli kontinu blong sendem ol wokas, mo i no klia yet wanem nao plan blong kavman blogn adrese isu ia.

Commissioner Meltenoven hemi talem se blong adresen isu ia i nidim strong politikol wil.