Tu niu Twin Otter plen bae i kasem kaontri long en blong yia.
Jeaman blong Air Vanuatu, Sam Firi, i konfemem long VBTC Nius folem isu blong tufala twin otter AV12 mo AV11.
“Fes wan hemi sud kam long fes blong November, be yumi stap traem blong toktok wetem manufacturer blong aircraft blong sapos oli save spidim ap lelpet blong aircraft hemi save kam long September o October bai hemi gud blong helpem operesen demand blong yumi,” Mr Sam Firi i talem.
Tufala twin otter ia blong wan company blong Canada we oli kolem Ikhana.
Long wan online nius long June 10, i rivilim se Air Vanuatu hemi stap wantem fokas moa long domestic fleet blong hem.
Smart Aviation Asia Pacific i talem se Chief Executive Ofisa blong Air Vanuatu, Atu Finau i bin rispon long wan email se oli stap lukluk lonhg wan niwfala road ‘fleet review’.
Mr Atu hemi talem long olgeta se airline fleet blong naoia i kat wan ATR 72, one boeing 737, wan Britten Norman islander mo tu De Havillan Aircraft blong Canada Twine Otters.
Hemi konfemem long nius ia tu se new Twin Otter bai kam long en blong yia ia mo kavman hemi help blong pem mo oli stap proposem blong pem tu wan seken Boeing 737.
Mr Finau i talem se hemia bai hemi expandem domestic fleet mo improvum abiliti blong meitainem flaet schedule, adem niu service mo dilivarem kwaliti seves.
“Airline hemi kanselem oda blong A220 blong hemi save fokas long ol domestik fleet expantion ia,” Mr Finau i talem.
“Air Vanuatu bai hemi no ko hed wetem oda blong tri Airbus A220s, be bai mifala i lukluk long ol opsen olsem pat blong fleet review,” Mr Finau i talem long email rispon i ko long Smart Aviation Aisa Pacific.
Long isu blong Twine Otter AV12 Kavman i ofisiali konfemem se oli pem wan amaon blong VT37 million blong outstanding lease blong plane ia.
Manei ia i transfea afta long wan 15 dei notis we owna blong plane Hevilift i kivim long Airline.
Director blong Ministry blong Finance, Dorothy Erickson i konfemem long local newspepa se oli proceses amaon blong VT37Million last wik i ko long Hevilift. Ful outstanding amaon hemi VT41 million.
Communication Ofisa blong Ministry Infrastructure, Antoine Malsungai, i talem se bod blong airline i no save kivim eni moa komen from oli stap lukluk long wan nara kot kes.
Kes we i stap bifo long kot naoia hemi blong Twin Otter AV11, we John Buchan, i stap sueing airline from hemi no folem agrimen blong pem plane ia. Wan outstanding amaon blong ova VT300 million.
Kes hearing bai hemi tekem ples long manis August.
