Sam Ni-Vanuatu seasonal wokman long Saot Australia oli tes positiv long COVID-19.
Ol Reliable Sos oli konfemem long VBTC Nius se long Santroph farm oli kat seven oli positiv mo ova tri hemi ol Ni-Vanuatu. Long wan nara farm long Guyra oli konfem se 15 Ni-Vanuatu oli tes positiv long virus.
Ol Sos we oli no wantem rilisim nem blong olgeta from sensitiviti blong isu ia oli konfem se ova 100 wokman oli stap long kwarenti long tufala farm.
“Long Santroph farm wan boy Vanuatu mo Solomon Islands oli bin karem virus ia i kam long wan nara farm long taem blong selebresen we i pas.” Sos ia i talem.
“Long las wik oli bin testem tufala man mo tri narafala mo faenem se oli positiv, health ofisiol i muvum olgeta i go long Adelaide, wael olgeta we oli silip kolosap wetem olgeta oli ko long kwarentin.”
Long nara farm long Guyra, Sos hemi rivilim se oli tracem wan boi Vanuatu we hemi karem virus i kam long farm afta we hemi bin ko long wan selebresen wetem famili blong hem.
“Plante long mifala we i stap long kwarentin long haos mifala i stap witaot pei, mbe bill blong laet, wota, transpot mo akomodesen mifala kontinu blong pem.
“Hemi wan samting mifala luk olsem wan slap long fes blong mifala, mbe long wan nara lukluk tu might God i stap putum wan mesej se sam long mifala we wokbaot i no stret, mifala i mas luk save rod blong mifala.”
Olgeta seasonal wokman we oli no ko long kwarentin long Saot Australia, oli talem se oli wok moa haoa blong kavremap shift blong ol nara wokman. Mbe nomata hemia plante fruit i waste from i nogat enaf wokman.
Commissioner blong Labour, Murielle Metsan Meltenoven, i talem se oli kasem infomesen finis abaot ol Ni-Vanuatu we oli kasem COVID long Australia.
Mrs Meltenoven i talem se Kavman blong Australia i tekem isu ia i serious.
“Yumi stap lukluk kolosap long situation ia, yumi kat sam State long Australia we oli kasem sick ia, ol otoriti long Australia oli stap lukaotem gud ol wokman mo mekem sua se oli no aot long ples we oli silip long hem mo provaedem health sapot long olgeta,” Mrs Meltenoven i talem.
Mrs Meltenoven i no kivim eni namba blong ol Ni-Vanuatu we oli kasem virus ia mbe hemi folem wan ripot we hemi risivim.
Hemi askem evri seasonal wokman blong no wokbaot olbaot folem outbreak we i stap naoia long Australia espeseli lo Saot.
“Kontinu blong werem mask, no wokbaot olbaot, yumi enkarejem olgeta blong taem oli finis wok nomo oli kobak long ples we oli silip long hem,”Mrs Meltenoven i talem.
“Bae oli save tekem virus nomo sapos oli ko wokbaot long ples we oli no sapos blong ko long hem.”
Saot Australia hemi kasem bigfala outbreak blong COVID-19 afta we oli bin openem boda blong olgeta las yia. Long latest health statistics bitwin December 27 2021 mo January 9 2022 oli rikodem ova 36,000 kes.
