Ministri blong Helt i talem se Minista blong Climate Change hem i no putumaot eni COVID-19 helt risk from hem i bin aplaem social distancing.

Spokspesen blong COVID-19, Len Tarivonda i talem se “long assesmen blong yumi blong helt, i nogat any risk se Minista blong Climate Change hem i putum hem wan long wan risk blong kasem COVID-19 o blong transferem COVID-19.”

Respon ia i kam afta we fes ordinari siting blong palamen i no bin save kohed long Thursday moning from ol memba long oposisen saed i no bin tenap long siting long dei ia mo boycotem palamen folem alekeisen se state minister ia i brekem COVID-19 rul mo ko long wan kwarentin fasiliti.

Minista blong Climate Change, Bruno Leingkone i talem se bifo hem i ko long kwarentin fasiliti ia, ol protocol ofisa oli stap finis, Commander Police South, Operation Manager blong National Disaster Management Office, Jimmy Narua mo wan memba blong COVID komiti.

Hem i talem se “oli arenjem mo protocol i stap, taem mi ko, mi ko stret long administration mi mit wetem maneja vinis afta mi kamaot. Hem i ten minit nomo. Mifala i stap smol taem nomo ale mi kambak.”

Minista Leingkone i talem se hem i bin ko blong toktok from isu blong wan long olgeta polis ofisa we i stap long kwarentin.

Mr Leingkone i talem se hem i ko nomo blong toktok wetem boss blong kwarentin fasiliti ia blong kivim assurance nomo se bambae olgeta i mekem sua se i gat securiti long fasiliti i stap.

Hem i talem se hem i no bin mitim olgeta we oli stap long kwarentin, hem i ko stret nomo long administreisen, toktok wetem boss blong quarantine fasiliti mo hem i kambak.

Oposisen Lida Ralph Regenvanu i talem se “Loa blong Vanuatu hem i aplae equali long everi citizen blong Vanuatu mo palamen ia hem i ples blong mekem ol loa.

“Yumi no mekem ol loa we sam man oli save trikim, so yumi kol upon kavman, Praem Minista, yu traem mekem wan samting long ol kes olsem?

“Hem i no festaem we minista i mekem fasin ia long tis kavman,” Ralph Regenvanu i talem.

Lida blong Kavman, Praem Minista Bob Loughman i talem se opposition hem i no nid blong boycott be hem i mas faenem stret infomeisen fastaem.

Hem i se long lukluk blong hem opposition i usum keis ia nomo blong pleim politik blong hem.

Praem Minista Loughman i talem se Minista blong Climate Change i bin ko long wan risot ia mo hem i bin exercisem COVID-19 protocol.

“Sapos hem i bin gat courtesy blong jekem weta o not nius ia hem i tru ten hem i tekem aksen folem, because hem ia hem i konsen blong yumi everiwan,” Praem Minista Loughman i talem.

Hem i talem se “mi wantem talem olsem se having namba tri extension blong steij of emejensi, everi man long kaontri ia oli save wok mo responsibiliti blong olgeta.”

Fes Ordinari siting blong Palemen we i sapos blong mit Thursday hemi muv iko long Tuesday 16 June.

Spika blong Palemen, Gracien Shadrack hemi adjounem palemen from ino gat quorom blong palemen i gohed.

Long Thursday, everi memba long saed blong Gavman i bin stap long palamen mbe olgeta long oposisen i no bin tenap.

Kavman hem i disaed blong salem bigfala shea blong hem long National Bank blong Vanuatu i ko long Vanuatu National Provident Fund.

Council blong ol Minista i endosem desisen blong Vanuatu National Provident Fund (VNPF) i inkrisim shea blong hem long National Bank blong Vanuatu i ko long 60 pesen.

National Bank blong Vanuatu (NBV) i gat tri sheaholda, Vanuatu Kavman we i stap holem 70 pesen shea onasip, Vanuatu National Provident Fund wetem 15 pesen mo International Finance Corporation wetem 15 pesen.

Mbe naoia Council blong ol Minista i rekomedem blong Vanuatu National Provident Fund i inkrisim shea blong hem blong 15 pesen ia i ko long 60 pesen.

Minista blong Faenans, Johnny Koanapo, i wan hapi man taem hemi anaonsem brektru ia long wan pres konfrens.

Minista Koanapo i talem se “long rekomendeisen blong Council blong ol Minista, Vanuatu National Provident Fund board hem i also apruvum 5 June se bambae VNPF hem i inkrisim shea holding blong hem insaed long National Bank blong Vanuatu i ko long 60 pesen.”

“Mo mi andastan tu se hem ia hem i bin ko tru long konsolteisen mo kaonsel hem i tekem disisen ia,” hem i talem.

Minista Koanapo i gohed blong stresem impotens blong wok tugeta blong tufala nasonal faenansel institusen ia.

Hemi pointemaot se wetem 60 pesen shea blong VNPF ia i riflektem slogan blong NBV we hemi Vanuatu’s Own Bank.

Minista blong Finance ia i talem se “VNPF wetem jenerol maneja wetem everi bod memba we oli stap wok had mo taem we kavman hem i tekem wan disisen olsem, semtaem nomo oli kontinu blong wok blong sapotem rekomendeisen o disisen blong Council blong ol Minista.

“Inkris long invesmen blong Vanuatu National Profident Fund long National Bank hemi wan opojuniti mo bambae hem i minim se tufala bae i kontinue blong joinem han blong wok tugeta blong ajivim ol nasonal gol we kavman hem i setem,” Minista Koanapo i talem.

Fulap kostol eria long Vanuatu i gat tumas toti long hem.

Wan marine litter survei we bin hapen long World Oceans Day long namba 08 June we i kaverem ap wan distens  blong 3.5km i bin faenemaot.

Marine litter survei ia we Maritime mo Ocean Division i okanaesem wetem sam kavman dipatmen, Wan Smol Bag Theatre mo Live & Learn oli bin ko aot long Not blong Efate blong mekem marine litter survei ia long kostol eria blong Punagisu, Emua mo Samma vilij.

I bin gat tu ol komuniti memba blong ol trifala vilej ia oli bin joinem tim blong mekem survei ia.

Hed blong Maritime mo Oceans Division, Tony Tevi i talem se tim we hemi lidim i bin disaed blong usum impoten dei blong ocean blong help klinim solwora.

Hemi talem se i gat fulap toti long solwora we oli bin faenem long ol eria ia, we i kontribute bikwan blong destroem ol living ting long solwora.

I no hemia nomo, be i contribute tu long fish poisoning long eria blong Not Efate.

Okeisen ia i no blong komemoratem nomo Wol Oceans Dei be hemi blong selebretem tu strong patnasip wetem ol releven patna inkludum ol komuniti long proteksen mo manejmen blong ol marin risos.

Ol wok ia, hemi inlaen wetem fes nasonal polisi blong ocean we i bin lonj long 2017.

Ol toti we tim i bin karemaot i gat ol toti blong plastic bag, ol toti tin, wota botel, pepa stro mo ol narafala moa.