Oli faenem wan niu species blong Coconut Rhinoceros Beetle long Efate.

Biosecurity Dipatmen hemi ditektem CRB- G, niufala species blong bitel long ol eria raon long Port Vila long 2021.

Long wan interview wetem Director blong Biosecurity, Meriam Toalak hemi talem se i kat hae posibiliti se hemi mekem wei blong hem i kam taem kaontri hemi stap fokas long COVID-19.

“Sam long ol sampol ia i kambak mo i soem se yumi kat CRB-G long Vanuatu,” Ms Toalak i talem.

“Bitel ia i stap wetem yumi long Vanuatu mo long map i soem se CRB samplol we yumi kolektem long Mangaliliu i kam daon long Bukura, Mele mo Teouma, i kat sam sampol nomo we oli konfemem se i kat CRB-G.

“So ol sampol we oli kam long Ifira, Teouma i ko kasem long Mele. Suspek se hemi kam in long ol international kontena ship ia we i kat bitel ia long hem.

Kavman hemi spendem araon VT35 million blong stopem spred blong bitel sins we oli ditektem long North Efate long 2019.

Be nomata long ol wok bitel hemi ko hed blong spread, wetem niufala species Biosecurity hemi talem se hemi save spred ariap bitim hemia CRB-S we oli faenem long 2019.

Fokas blong Biosecurity hemi blong kontenem bitel ia long Efate blong i no kasem ol nara aelan.

“Bitel ia i bin stap long Mangaliliu sam yia i pas mo yumi bin traem ol wei blong kontenem be hemi stil muv,” Ms Toalak i talem.

“Yumi aplaem ol method blong Sanitation, yumi rikruitum ol casual blong wok field, bildim breeding box blong trapem ol bitel wetem ol biocontrol agent.”

Species we oli faenem long Mangaliliu long 2019 hemi CRB-S.