Wan Climate Advocator hemi kol blong aksen folem hae namba blong ol settlemen long ol low lying eria.
Naoia we i stap i nogat eni loa blong stopem settlemen long ol disasta zone.
Konsen hemi reis hemi folem hevi flood we i hapen long en blong Octoba mo i lukim evacuesen blong komuniti we i live raon long Teouma Bridge.
I kat alegesen hemia hemi ol informal settlemen we i lukim agrimen bitwin ol land owna blong ol low income earna ia oli settle long hem.
George Koran long Vanuatu Climate Action Network Secretariat, hemi talem ol eria ia hemi no sef blong pipol i live long hem.
“Olsem long Teouma Valley hemi wan eria we Vanuatu Polis Force i bin evacuatem(muvum aot) ol famili long hem blong tu -tri taem nao. Yumi luk se hemi wan disasta eria vinis we long las tu dei we hemi pas yumi luk se sam pipol i stil liv long ol plesia mo oli askem polis blong asist we hemi rong eria vinis,” Mr Koran i talem.
“Mo yumi mas tekem aksen. Evri wan i nid blong tekem aksen, kavman dipatmen, ol politician mo ol Non-Government Organisation.”
Folem ol infomesen long dipatmen blong Land wetem Geo Hazards i nogat wan loa blong stopem kaen settlemen olsem be ol authoriti oli save advaes nomo long denja blong eria ia.
Blong adresem ol developmen long kaen eria olsem wan ofisa blong Geo Hazard hemi presen long table blong land lease komiti blong kivim advaes long ol difren eria we hemi fesem natural disasta.
Darren Fatu, Senior Planning mo Enforcement Ofisa long Lands dipatmen hem i talem se olgeta oli nogat raet blong stopem eni settlemen long eni eria.
Mr Koran i talem se i nid blong kat ol polisi in ples blong adresem isu ia.
“Ol eria ia yumi no dividem blong salem from yumi save vinis, ating yumi nid blong strengthen polisi mo compliance long hao ol infomol settlemen i stap hapen from taem yumi adresem isu ia mo wok long hem bae yumi save luk se risk long ol kaen disasta olsem ia risk long laef blong pipol i ko daon,” Mr Koran i talemaot.
Mr Koran hemi kol long ol pipol we oli liv long ples we i flooding blong oli mas muv i ko long ol ples we i hae blong mekem se ol aktiviti blong hevi rein folem climate change i no afektem olgeta.
