Wan kriminol investigesen i stap long folem olgeta alegesen se wan agrimen long jack makerel fishing raet blong Vanuatu i no valid from hemi no karem apruval blong gavman, Minista blong Foren Afea, Hon Marc Ati, i talem.

Vanuatu hem i karem wan kwota blong makerel fishing be anda wan agrimen, wan kampani hem i bin salem kwota ia i go long nara pati we i bin pem.

Be Hon. Ati i rilisim wan stetmen we i talem se i gat wan investigesen long agrimen ia from hem i no stret, mo i no kasem aprovol blong Kaonsel blong Minista.

Hon. Ati i talem se gavman i bilif se bae i gat arest long investigesen ia ino longtaem.

Mo gavman hem i bin go long Suprim Kot blong traem karem bak mane long wan tuna fishing kampani blong Vanuatu.

Gavman i talem se kampani ia i bin risivim mane we i mas go long Vanuatu.

Hon. Ati i talem se Vanuatu agrimen hemi wan “shocking” kes blong exploitasen mo wan injustis se Vanuatu i mas mekem stret.

Hemi talem se mackerel kwota hemi wan long ol importan resors blong Vanuatu.

Foma praem minista Hon Ishmael Kalsakau hemi bin resemap strong konsen blong hem long agreement ia long festaem we infomesen abaot agreement ia hemi kamap.