Wan memba blong Opposition hem i bin reisem konsen ova long opening blong ol boda long ol travela we bae oli kam in long ol COVID-19 fri kaontri mo talem se Vanuatu hem i no redi.
Taem hem i stap respon long anaonsmen blong Kavman blong setemap ‘Tamtam Bubble’ we bae hem i alaoem travel bitwin ol kantri we i fri long COVID-19 blong 30 dei, Memba blong Palamen, Jotham Napat, i talem se Vanuatu hem i nogat kapasiti mo risos blong openem ol boda blong hem long turism.
“Ol risos long helt sekta mo ol fasiliti blong testing hem i no inaf,” Mr Napat i talem.
Hem expresem bigfala wari ova long how ol COVID-19 kes long Australia oli kontinu blong go antap.
“Australia hem i wan moa advans kaontri long yumi, wetem inaf risos blong stanap akensem coronavirus. Mbe ol kes oli kontinu blong ko antap. Imagin sapos oli faenem wan kes long Vanuatu. Hao nao bae yumi save dil wetem?” hem i talem.
Hem i bilif se Vanuatu hem i mas karemaot planning mo risk analisis bifo hem i openem ol boda blong hem.
Long wan respon, Minister blong Trade mo Tourism, James Bule, i talem se Tamtam Bubble bae hem i stat olsem wan smol windo.
“Fastaem, bae yumi open boda nomo long ol kaontri we oli nogat kes blong COVID, olsem New Caledonia, Solomon Islands mo New Zealand bae i save join sloslo. Mifala i no stap tinktink blong openem boda long everi kaontri,” Minister Bule i talem.
Minister Bule i talem se bubble bae hem i stat wetem bilateral agrimen bitwin ol kaontri mo bae oli tekem gud kea taem oli aplaem Tamtam Bubble long ol travela.
Naoia ol COVID-19 protokol blong bubble ia, oli no faenalisem yet mbe Minister i talem se bambae oli redi gud taem boda i open bakeken.
Council blong ol Minister hem i bin apruvum muv blong openem bak ol boda blong Vanuatu long September yia ia tru long ‘Tamtam Bubble’.
Vanuatu hem i bin klosem boda blong hem long ol ovasi travel long leit manis Maj.
