Long semtaem hemi hard blong karem in ol staff blong kam wok from bigfala wind blong saeklon tete.

Mr Atu hemi ripotem se i kat sam pipol i admit long hospital from injuri(Oli kasem kil) mo oli expektem sam moa.

Long saet blong ol niu bon babie long niufala intensiva kea unit, Neo-Haven, oli muvum olgeta i ko stap long theater.

“I kat wan kapa i flae aut so wota i kam insaet, mifala i muvum olgeta pikinini i ko aut, bai olgeta long meintenens bai oli ko stap long ruf tumoro blong sekurum ol kapa bageken,” Mr Atua i talem.

Mr Atua hemi talem bigfala tankiu long komuniti blong Seaside eria we oli bin kam blong help aot blong mobem ol ward from flood.

“Jif blong olgeta i lidim olgeta i kam volunteer afta we oli luk nid blong klin ap long Surgical, Medical mo Children ward. Oli help mobim floa mo karem aot ol toti we oli flae long wind i kam,”Mr Atua i talem.

“Moa tu oli helpem blong muvum sam pesen i ko long sef ples.”

Mr Atu hemi notem se i kat wan nara saeklon i stap kam, moa bai oli nidim komuniti help long tumoro i ko blong klin up.

Hemi asurem se servis blong hospital bai kontinu mo olgeta we nidim medikol asitens oli save ko pas.

Mbe hemi talem se bai seves hemi save dilei tumoro i ko from situesen blong saeklon long hospital.

Mr Atu i talem bigfala tankiu long ol staff we oli save help tru aot long day tete blong kipim ol pesen i sef.

Long semak storian wan nara dokta long Vila Centrol hospital i praisem karej blong wan yangfala blong Seaside Tongoa, afta we hemi bin klimb ko antap blo nilim wan kapa we i bin redi blong flae aot.  Hemia klosap long Medical ward.

“Hemi wan volunteer mo hemi riskim sefti blong hem blong kivim gud seves ia. Yu wan hero yangfala,” Dokta Sale Tamata Vurobaravu i talem.