Pipol i save faen VT100,000 sapos oli swim mo kakae long solwota blong Erakor Lagun long Efate.
Direkta blong Dipatmen blong Water Resources, Erickson Sammy, hemi saenem ban o tabu blong nomo yusum solwota ia long tete moning.
Direkta Sammy hemi talem se nomata long plante toktok we oli karem blong banem Port Vila haba long 2019, oli biliv strong se wetem aksen long lagun ia bai hemi wan nara sakses blong ristorem bak solwota wetem ol risos blong hem.
Wan longtaem fisherman, Nono Sablan i bin talem se solwota long aria ia i nomo klin olsem bifo.
Paramount Jif blong Erakor, Jif Kalsaur Kalomtak Pomal 8, i talem tank yu long kavman mo talem se hemi wan samting we oli wokbaot from blong plante yia blong stopem polusen long solwota mo protektem marine risos blong futja.
