Minista blong klaemet jenj, Hon Ralph Regenvanu i talem se agrimen we ol kantri i bin mekem long saet blong klaemet jenj long COP28 hemi no strong tumas.

Hemi talem se ol kantri mas pem moa mani blong adressem impact blong klaemet jenj mo stoppem use blong fossil fuel. 

United Nations klaemet meeting long Dubai, COP28, hemi finis long las wik. 

Long end blong miting ia, ol kantri oli mekem wan final statement, we oli agri blong plan we ol kantri oli mekem blong addressem ol issue blong klaemet jenj.

Statement ia hemi fes statement blong COP we oli toktok long saet blong fossil fuel, be Hon Regenvanu i talem se toktok insaed long agrimen i no strong enaf.

Hemi i talem se Vanuatu i no karem evri samting we hemi wantem long COP28.

“Toktok long saet blong katem emissions blong fossil fuels hemi wik, hemi no kasem level we yumi bin faet from,” Hon Regenvanu i talem.

“And Vanuatu olsem pat blong [Alliance of Small Island States]… yumi bin push had blong karem sam strong toktok i kam long saet blong commitment blong evri kantri long wol we i stap blong katem aot greenhouse gas.

“Yumi luk sam statement be hemi no really strong enaf blong mekem se ol bigfala kantri bae i save katem fossil fuels.”

Minista Regenvanu i talem se ol kantri we oli fesem fulap impact blong klaemet jenj, oli nidim moa mani long niu loss mo damej fund ia mo nara klaemet funding. 

“Amount of funding we hemi save kam blong helpem ol kantri olsem blong yumi, yumi always ting se hemi no enaf,” hem i talem. 

“Ol bigfala countries oli neva putum enaf … even when oli stap talem amount blong olgeta se bae oli givim, blong end of the day bae yu faenem se fulap taem mani hem i neva appear o yumi no gat access long hem.”

Nekis United Nations klaemet miting, COP29, bae hemi stap long Azerbaijan long Desemba 2024.

Bae hemi wan jans blong ol Pasifik kantri blong karem moa samting blong helpem adressem klaemet jenj.