Ol Maket Venda blong Wes Kos Santo i wantem isi askes long maket blong save winim vatu taem oli stap vot long Snap Eleksen.

Maket Venda blong Wusi vilij, Noelyn David i talem long VBTC Nius se hemi 44 yia blong Vanuatu be ol woman i stil spendem VT38,000 long bot mo trak blong kasem Luganville Maket.

Mrs David i talem se mani ia i bigwan tumas be wari hemi long ol Mango mo Watamelon we plante taem hemi no sale aot.

“Samtaem taem ol man oli no kam pem ol prodak blong mifala, mifala i luk se laef hemi hard long mifala nao, mifala i stap tinkbaot se mifala i no kasem mani blong trak,” Mrs David hemi talem.

“Mifala i wantem se taem mifala i vot bae ol Memba blong Palemen i mas pem wan ship blong givhan blong pem ol prodak blong olgeta long West Coast nomo.

“Yumi stap toktok ia mifala ol mama ia, sam oli tekem ova 30-40 bag blong mango be oli kasem maket oli ripe koko naoia stap black. Mifala i travel longwe tumas mo hemi hard.’’

Mrs David i talem se wari blong olgeta naoia hemi ol mango mo watamelon we i no sale aot naoia.

Plante taem oli mas mekem bakegen drae copra blong pem ol kaon blong transpot.

“Taem mifala i no kasem mani blong trak mo bot bae mifala i tinkbaot se naoia pa yumi mekem wanem nao?

“Nara wei hemi blong mekem nomo drae copra blong fixim bak ol kaon ia.”

Ol mama blong Wusi Vilij long Wes Coas Santo oli spendem VT 13,000 long bot blong kasem Tassiriki Pasis.

Long Tassiriki kasem Luganville long trak hemi VT25,000.

Ol mama ia oli salem Mango stat long VT10 i ko antap long VT200.

Watermelon i stat long VT 300 i ko kasem VT2000.