Waterwaste taskfos komiti i talem se Vila Central hospital i neva akt blong stopem polusen i ko long nambatu lagoon long Efate.

Erie Sami long Waterwaste taskfos komiti, i talem se bigfala hospital long town i kosem bigfala amaon blong polusen long lagoon ia olsem ol doti blong sewage o waste blong toilet, blood mo ol chemical we hemi ko direk long lagoon ia.

Hemi talem se mein hospital i save faen long VT 5 million sapos oli no folem direksen notis we i stap naoia.

“ Long nekis wik i ko bae yumi stat putum wan penalti notis  folem wetem direksen notis ia from isu blong olketa hemi wan long ol outstanding isu, yumi bin toktok wetem olketa long hospital plante taem mbe mi luk i nokat eni aksen,” Mr Sami i talem.

“ Mi tink hemi taem yumi stat putum aot ol notis ia i ko long ol risponsibol othoriti mo mi tink Kavman i mas kliarem fes blong hem festaem bifo hemi stat tajem praevaet sekta mo mekem compliance mo enfosmen.

“ Bacteria insaed long Nambatu lagoon hemi bitim hemia long Port Vila harbour folem ol bigfala amaon blong polusen we i bin stap hapen long taem.”

Acting Medical Superindentent blong Vila Central Hospital, Erolyn Tungu, i talem se i mas kat wan niu plan blong save fixim problem blong polusen ia long haba ia.

Hemi talem se “ Vila Central Hospital i bin kontraktem sam kampani blong fixim rod blong sewage ia mbe hemi no posibol.”

“ Yumi nokat wan propa man blong lukaotem sewage plan ia mo plan ia, hemi bin kontract on mo of wetem ol kampani mo naoia problem i stap nomo mo hemia nao yumi mas wok long wan niu plan blong fixim problem blong polusen,” Acting Medical Superindentendent i talem.

“ Storage blong sewage ia hemi wan chronic isu we i folem sewage system we i bin stap longtaem vinis.”

Vila Central Hospital i talem se oli tekem isu ia i ko long hae level vinis blong oli save dil wetem.

Mr Samie i talem se wok i stap ko hed blong putum tabu long eria ia.