COVID-19 Advisory Team Committee i konfemem wan repatriation flaet long New Zealand blong karem 121 pipol mo tu ded bodi i kam long Port Vila nekis wik.

Spokespersen blong COVID-19, Len Tarivonda, i talem se, flaet ia, Royal Airforce blong New Zealand bae i mekem, mo tufala ded bodi ia, hemi blong leit High Commissioner blong Vanuatu long New Zealand, Johnson Naviti mo leit Kenneth Worwor, wan wokman blong Recognised Seasonal Employee long New Zealand.

Hemi talem se, repatriation flaet ia bae i tekem ples long Tuesday nekis wik, mo bae i tekem ol famili blong leit Mr Naviti tu.

“ Yumi talem tankiu long Kavman blong New Zealand blong save helpem Vanuatu wetem flaet blong New Zealand Airforce plane ia,” Mr Tarivonda i talem.

“ Mo Committee blong COVID-19, i stap wok long ol nara repatriation flaet we bae i kam long ol nara kaontri .

“ National Disaster Management Committee i bin lukluk blong planem ol flaet tru aot long manis ia, nekis manis o blong ko kasem December, mo hemia i had lelebet, from se yumi no save gud gud yet amas pipol blong kambak long kaontri long ol wanem taem.”

“Air Vanuatu i kat ol schedule cargo flaet blong hem, mbe yumi mas traem blong linkim ol repatriation flaet ia, wetem ol cargo flaet ia, mo bae yumi stat blong wok wetem Air Vanuatu long nekis wik i ko,” Mr Tarivonda i talem.

Mr Tarivonda i konfemem tu se, i kat faev pipol i kam long flaet blong Talofa Airways tete long Samoa.

Hemi talem se, wan nara pasenja we hemi wan mama, hemi no save folem flaet ia tete, from hemi kat bebe mo hemi bin bonem bebe blong hem yestete long Samoa.

“Everi pasenja ia, we oli kam insaed long kaontri oli mas folem protocol blong COVID-19 blong kwarentin  14 dei,” Spokespersen blong COVID-19 i talem.