Kavman i pasem wan jenis long loa blong alowem wan minista i apointem six politikol advaesor.

Hed blong Kavman i putum jenis blong act long Palamen haos long wik ia mo talem se “Kavman act hemi no reflektem wanem we i stap long salaries act.

Praem Minista, Bob Loughman i talem se “Long kavman act we i stap naoia hemi talem se wan minista bae i kat tri polilikol advaesor nomo.”

“Be long Salaries act hemi givim paymen blong six politikol posisen ia we i bin stap longtaem vinis i kam,” hemi talem.

“Jenis ia i blong reflektem wanem i stap vinis.”

Praem Minista, Bob Loughman i talem se hemi no wan niu samting be i blong mekem sua se kavman mo salari act i talem six politikol advaesor.

Hemi talem se tufala act ia i mas semak nomo.

“Ol politikol posisen ia hemi blong sapotem wok blong wan minista insaed long Ministri long saed blong administrativ wok.

“Ol nara wok blong olgeta hemi blong karem ol isu blong ol komuniti we wan memba i kamaot long hem.”

Praem Minista Loughman i talem se hemi wok blong wan minista blong apointem ol politikol advaesor blong hem.

“Six politikol posesen ia bae i nomo save ko antap moa folem mane we i stap vinis long Salaries act blong kavman, “ hemi talem.

Jenis ia i kam unda long bill blong Statute Law miscellaneous provision act 2020 we i bin pas long Wednesdei long wik ia.