Ol Fire Fighter, Engineer mo Air Traffic Control long Bauerfield airport i kam leit long wok tete moning mo i kosem wan haoa dilei long Air Vanuatu flaet i ko long Sydney tete moning.

Taem ol 120 plus pasenja oli sitaon insaed long plen mo wet blong flae aot, Kapten i anaonsem dilei folem leit arivol blong ol staff long tri essential seves ia.

Kapten blong flaet i anaonsem tu se long ol pasenja se ol tri seves ia oli kleim se oli no bin infom long 4am reschedule seves long sydney.

Sam pasenja i talem long VBTC Nius se airline i jek in mo mo immigration i bin kam long taem mo mekem wok.

Wan pasenja i talem se i luk olsem i kat wan bigfala brekdaon long komunikesen we i fosem dilei ia.

Sam turis long air Vanuatu flaet we i stap ko bak ovasi afta long holidei long Vanuatu i talem se oli no glad.

Chief Executive Ofisa blong Airports Vanuatu Limited, Jason Rakau i talem sori bigwan long wanem we i hapen long moning.

Mr Rakau i talem se oli akseptem se hemi felia blong olgeta mo wok blong i no hapen bakegen long fuija.

“Understanding blong mi, hemi ol fire fighter oli dilei lelbet blong atend long flaet blong eli moning,” Mr Rakau i talemaot.

“Mi tink ova long pas few wik, mi andastand se i kat fulap disrapsen long ol flaet blong Air Vanuatu wetem ol isu blong ol aircraft(Plen). So i bin kat fulap jenis mo timing blong ol flaet tu we i hapen blong mekem se yumi kaj ap bakegen long ol disap flaet bifo long hemia.Mo mi tink hemi no fault blong eniwan long stej naoia mbe mi biliv se hemi wan miskomunikesen ia nao i mekem se ol fire fighter i no atend long taem folem ol niu jenis long ol taem we oli putum tugeta.”

Mr Rakau i talem se bae oli korektem mo muv fowod.