Minister blong Klaemet Jens, Hon. Minister Ralph Regenvanu i adresem ol bigfala lida blong wol mo talemaot strong se evri kantri long wol oli mas stopem use blong fossil fuel.

Minista Regenvanu hemi mekem toktok ya long United Nations klaemet sumit, COP28, long Dubai long wik ia.

Hemi talem se Vanuatu i kam long COP28 wetem “high hopes” se sumit ia save deliverem o givim strong risal we hemi save karem i kambak long Vanuatu.

Minista Regenvanu i talem se ol parti long COP28 oli mas mekem blong strong taket blong stopem ol toti gas we i spoilem envaramen, mo oli mas tripolem ol namba blong renewable eneji mo dabolem kwaliti blong eneji kasem 2030.

Be hemi talem long ol lida blong wol se blong COP28 hemi successful, bae hemi nid blong agri long wan plan blong stopem yius blong fossil fuel, mo putim wan end long ol subsidi blong fossil fuel.

Long toktok long COP28, Minista Regenvanu hemi talemaot ol prioriti o nid blong Vanuatu long COP28.

Hemia blong adapt long ol problem blong klaemet jens, mo hemi talem se i gud ol nara kantri long wol i putum moa wok blong bildemap resilience mo sustainable o strong development.

Mo Minista Regenvanu hemi talemaot tu se Vanuatu olsem wan vulnerable kantri long wol, hemi nidim klaemet faenans o mani we hemi wan nara key prioriti blong kantri.

Mo tu hemi toktok long saet blong ol mani we ol kantri i pem blong loss mo damej fund. Hemi talem se fund o mani ia mas adresem spesal circumstans o nid blong Vanuatu.

Minista Regenvanu i talem se ol aksen we yumi mekem blong adresem klamet jens, yumi no mekem hemia blong yumi wan nomo, be yumi mekem hemia blong ol pipol blong yumi long ol taem we i stap kam.