Vanuatu Cargo sip i still stap yet long Mele Bay nomata we National Disaster Management Office i odarem hem blong i mas aot long boda blong Vanuatu.
Director blong National Disaster Management Office, Abraham Nasak, i talem se intanasonal vesel ia we i rejista lokoli, i no rispektem sovereiniti blong Vanuatu mo i brekem State of Emergency Regulation Oda namba 71 mo 77 blong 2020.
COVID-19 restriction mo State of Emergency Regulation Oda ia i talem se Vanuatu boda i mas klos long ol intanasonal vesel.
Sip ia hem i bin kambak insaed long kaontri long las wik afta long painting repair blong hem long Australia. Mo hem i stap anchor yet naoia long Mele Bay.
Director Nasak i talem se, “Sip ia i no bin respektem instraksen we i bin ko aot blong hem i mas lego Vanuatu wota.”
Hem i talem se ol regulation oda we i stap naoia blong State of Emergency, i no alawem blong sip ia i mekem voyage blong hem i kam in.
“Hem i brekem olgeta regulation oda we hem i minim se naoia olgeta relevant otoriti oli stap lukluk blong tekem further aksen akensem person we hem i kivim authorisation blong sip hem i kam in long kaontri wetem olgeta kru blong sip mo kampani we hem i onem Vanuatu Cargo,” hemi talem.
National Disaster Management Office i talem se Ports and Harbour Depatman i stap monitarem sip ia kolosap.
VBTC i kasem ripot se i shud gat wan miting we i shud hapen bitwin Vanuatu Cargo mo National Disaster Management Office be i no hapen yet.
Commercial Manager blong Vanuatu Cargo, John Mark Bell, i talem se afta long dekleresen blong COVID-19 long Australia, oli rilisim sip i go long solwora.
Hemi talem se stat long taem ia, hemi sendem email i go long Advisory Team long National Disaster Management Office blong help kivim plan blong oli save folem blong fasilitatem sip blong kambak long kaontri, from everi dei oli mas mitim cost blong sip we i stap long board yard blong Australia.
“Mi bin draftem wan repatriation plan folem regulation oda long State of Emergency mo mi ekspektem blong National Disaster Management Office hemi apruvum plan blong mi blong mi tekem sip i kambak,” Mr Bell i talem.
“I nogat eni response, whatsoever, until 5:30pm [long Thursday], mi karem fes response long Director blong National Disaster Management Office, we hem i servem long mi afta long working haoa blong talem se mi mi brijim oda namba 70, 71 mo regulation oda blong State of Emergency.”
Vanuatu Cargo hemi wan domestic vesel be from hemi bin travel i go aot saed i mekem se i mas karem apruvol blong National Disaster Management Office bifo i kambak insaed long wota blong Vanuatu.
I gat ten kru we oli stap insaed long sip ia naoia mo oli no alao blong kam sho.
