Spokespersen blong COVID-19 i talem se COVAX fasiliti i akseptem rikwes blong Vanuatu blong save kat akses long medisin blong COVID-19.
Russel Tamata i talem se hemia i tru long wan sabmisen blong Vanuatu blong joinem ol nara kaontri long wol blong save kat akses long medisin blong COVID-19 taem i redi.
COVAX hemi wan pila blong akses long COVID-19 medisin.
Spokespersen Mr Tamata i talem se Vanuatu hemi ajivim fes pat blong negociasen vinis mo naoia Vanuatu hemi mas prepea from legaliti blong save impotem medisin ia i kam long kaontri.
“ Long steij ia mifala i stap wok wetem State Law ofis blong lukluk long ol pepa blong save impotem, “ hemi talem.
“Mo hemia nao yumi stap wok long hem.”
Mr Tamata i talem se taem Vanuatu i kat akses long medisin ia, bae 50 percen blong population blong Vanuatu oli kat akses long stik medisin ia fastaem.
Hemi talem se hemia i folem hae namba blong sik blong Non-Communicable Disease we fulap long ol pipol oli stap long hae risk.
“ Mifala i bin akt se 50 percen blong population bae oli kasem stik ia from taem we yu luk population blong Vanuatu, long wan survey blong Non-Communicable Disease long yia 2012 i soem se kolosap 90 percen blong population oli kat sik ia,” Mr Tamata i talem.
“ Hemia i inkludum tu ol frantline ofisa we oli stap dil wetem repatriation mo kwarentin blong mas tekem stik ia.
“ Kavman blong Vanuatu bae hemi no spendem mani, mbe bae hemi kam folem sapot blong ol dona patna we oli redi blong helpem Vanuatu blong pem ol medisin ia, even logistic arenjmen blong rolem aot medisin ia long kaontri.
“ Jus blong wanem kaen medisin i kam long Vanuatu, bae hemi kasem apruvul blong World Health Organisation mo bae medisin we i kam bae hemi mas matjem environmen mo temperature we yumi kat.”
Mr Tamata i talem se helt i wantem mekem i klia long olgeta we bae oli akses long medisin ia festaem se medisin ia bae i gat saed efek blong hem.
“ Hemia i wan nomol samting from i kat sam pipol we bodi blong olketa i save react long wan niu medisin,” hemi talem.
“Wetem ol toktok we i stap on hed naoia, lukluk i stap se medisin blong COVID-19 i save redi long midel blong nekis yia 2021.
