European Union i kivim two wik long Vanuatu blong stretem ol isiu blong pasport sale program blong hem.
Hemia afta i kat ol international konsen i reis abaot risk we hemi stap long saed long hao Vanuatu hemi bin stap mekem ol jek ia, i kat ol ripot se i kat ol criminal oli stap karem paspot blong Vanuatu.
“Oli faenem sam eria insaed long program blong yumi i weak mo naoia oli sikim klasifikesen mo sam moa infomesen we yumi mas provaedem long olgeta blong tu wik,” Daerekta blong Vanuatu Financial Intelligent Unit, Floyd Mera
“Afta long tu wik ia bae oli mekem wan disisen sapos oli satifae mo save kontinu long proposal blong pusum i ko long European Commission. Sapos no oli satifae mo leko mata ia i stap olsem.”
Mr Mera i talem se blong CS Global kampani we Vanuatu Citizenship Commission i mekem bae i nosave karemaot toti long prokram.
“Citizenship Ofis hemi tekem wan aksen we hemi disaed blong engejem wan kampani, nem blong hem i CS global blong tekem sam maketing aktiviti long behaf blong Vanuatu,”Mr Mera i talem.
“O promotem citizenship tru long investmen o dual citizenship. Mo i kat smol toktok se hemia nao bae i rispon long ol isu we Vanuatu i kat wetem European Union.
“Long rispon infomesen we mifala i kasem se CS Global bae i nosave adem eni value blong European Union i akri wetem yumi long ol kwesten we oli kat.
Mr Mera i talem se hao Vanuatu i save impruvum citizenship program blong hem, hemi blong stretem ol ol internal proses mo rikwamen blong hem insaed long kaontri.
Citizenship Ofis i anaonsem se FACT UK agensi bae i help blong mekem jek long ol man we oli aplae from program.
Wok blong hem i blong helpem Vanuatu Financial Intelligence Unit blong mekem extra jek long ol man we oli aplae from citizenship program.
Mbe long wan press rilis, Director blong Vanuatu Financial Intelligent Unit, Mr Mera hemi statem se folem loa Vanuatu National Citizenship Commission hemi sud consultem olgeta bifo hemi enkejem wan firm blong mekem wok blong jek long ol pipol we oli aplae from citizenship program.
Jeaman blong Citizenship Ofis, Ronald Warsal, i bin talem long VBTC Nius se Kavman hemi stap engagem tu new international agency blong help impruvum citizenship program.
Wan hemi FACT UK blong investigatem ol man we oli aplae from progam mo nara wan hemi CS Global Partners we bai hemi take ova long marketing blong program.
Mr Mera i talem se engagement blong FACT UK hemi sud folem law.
Hemi talem se regulation amendment blong program order no 38 blong 2020 hemi statem se Financial Intelligence Unit nao i responsibol blong engagem niufala kampani blong help.
Hemi se oli faenem engagement we Citizenship comisen i mekem long FACT UK bae costem Vanuatu VT6 billion long wan yia.
Mr Mera i talem se oli faenem finis tu top agency blong helpem hem long citizenship program mo cost blong tufala hemi less long VT1 million vt nomo long wan yia.
Hemi statem long press release se blong adresem proposal blong saspendem VISA waiva agrimen wetem European Union, i nid blong kat wan strong internal kontrol long citizenship program blong engagem wan international specialist kampani.
VBTC Nius i traem blong karem komen long Citizenship office mo kavman blong komen long steitmen blong Financial Intelligence Unit mbe i no posibol.
