Erromango, Tanna mo Aneityum i ko long level 3 folem ol COVID kes.
Health Minista, Bruno Leingkone i anaonsem long tete evening.
“Ripot we ofis blong mi i kasem se i kat six konfem kes long Tanna,” Minista Leingkone i talem.
“Ol investikesen i stap ko hed naoia long ol nara aelan blong Tafea Provins. Mo namba ia i save jenis long ol dei i kam.”
“Folem hemia mi saenem wan oda we hemi efektiv tete(March 27) we eni wan we i wantem travel aot long tri aelan ia i mas folem ol travel rul we i stap,” Minista Leingkone i talem.
“Pipol i save muv nomo from wan esensiol seves. Werem mask oltaem. Olgeta bisnis we oli no stap long esensiol seves oli mas klos. Social gathering i no alao. Skul i save ko hed be i mas folem COVID rul. Market bae i on nomo b i mas meintenem social distens(Stanap longwe long nara man).
“Hospital mo health seves i on wetem COVID vaccination. ”
VBTC Nius i kasem infomesen long ol otoriti long Tafea se Erromango i kat 2 kes.
Minista Leingkone i talem se Tafea i kat low vaccination reit, 46 percent i tekem tu stik.
Hemi talem se 52 percent oli tekem wan stik.
“Strong apil blong mas kasem stik from hemi tul blong help long taem blong COVID komuniti transmisen,” Minista Leingkone i talem.
Long lates ripot 111, 89 kes i rikod, Efate 52, Sanma 30, Pentecost 1, mo zero long Torba.
Sins outbreak 7054 konfem kes, 6518 oli rikava, 522 aktiv kes. 72.8 percent oli tekem stik long ful vanuatu , 82 percent oli kasem fes stik.
Torba, Pentecost, Sanma mo Tafea i stap naoia long level 3.
Shefa long level 2.
